India hmar lam, Uttarakhand-a ruah tam tak sur, ruah bing sur leh tu lian nasa tak avangin mi 24 vel an thi tawh.
Nainital atanga social media-a video thehdarhah chuan tui hi khawlaiah a luang nasa hle a, lei leh rel kawngte pawh a la tih a lang thei.
Nainital district-a Ramgarh-ah chuan ruah bing tam tak surin Naini Lake pawh a luang liam a, a bul hnai kawngpui, thingpui dawr leh thil dangte pawh a chim.
Thawhlehni bikah khan mi 11 vel thi an awm a, state chhung hmun hrang hrangah tangkhang an la awm bawk.
Chief Minister Pushkar Singh Dhami chuan a hma ni hnihah khan ruah sur kaihhnawiha chhiatna thlengah mi 16 an thi tih a sawi bawk a, lei min leh in chimah mi tam tak an la tang bawk.
Nainital chu Uttarakhand hmun dang atangin tlawhpawh theih lohvin a awm hmiah a. Khualzinten an tlawh nasat tak khawpui hi a kalkawngah lei min tam tak a awm.
Ramgarh-a ruah bing sur avang hian in chim leh lei minin mi tam tak a chhilh a. Nainital SSP Priyadarshani chuan, “Hliam tuarte chu chhanchhuah an ni a, chhilha la awm zat hi chiang taka hriat theih a ni lo,” tiin news agency ANI hnenah a hrilh.
Ramnagar-Ranikhet kawnga Lemon Tree resort-ah mi 200 vel tangkhang an awm a, resort-ah hian Kosi lui lian chu a luang lut a; mahse, him taka lak chhuah tawh an ni tih police chuan an sawi.
Hetih lai hian khawchin zirtute chuan Uttarakhand-ah hian ruah sur a ziaawm tan dawn niin an sawi a. Himachal Pradesh-ah October 22-23 hian ruah leh vur surin Uttarakhand, Punjab, Haryana, leh Rajasthan hmar lamah ruah a sur dawn niin an sawi bawk.