Dutch champion Ajax Amsterdam chuan UEFA Champions League knockout stage luh an hnaih thuak tawh a. Borussia Dortmund 4-0 a sawpin match thum atangin a vawi thum nan an chak.
Thawhlehni a Johan Cruijff Arena-ah Ajax in chawlhlawk hma leh hnuah goal hnih ve ve an khung a. Inkhel inhnehtawk tak tura ngaihah an mikhualte an barakhaih a, kawng engkimah Ajax an kheltha zawk.
Goal khung turin minute 11 chauh an mamawh a, Dusan Tadic-a freekick pet kual luh tur chu Dortmund captain Marco Reus chuan lo dan a tum a, an goal-ah bak a dang lut thei lo.
Minute 25-naah Ajax tan veteran dang Daley Blind-a’n goal a khung a. Penalty area hmawr atangin a ke veilamin a hem lut. Dortmund tan goalkeeper Gregor Kobel chuan Ajax goal khung belh tur hi a dansak nual.
Second half-ah pawh inhkhel danglam lovin kar hmasa a ram tana a vawikhatna atana inkhel Brazilian winger Antony chuan minute 57-naah an goal thumna a khung a. Dortmund tlarhnung pherh zarah striker rinrawl Sebastien Haller chuan minute 72-naah an goal hnuhnung ber a khung.
Tunhnaia European football a coach ngaihven hlawh ber zing ami Ajax coach Erik ten Hag chuan, “Zaninah kan thiltih apiang a hlawhtling zel a, kha aia tha khan Dortmund kha an khel thei chiang tih ka hria, mahse an khelh chhiat chhan kha kan ni ve tho. Zaninah pen khat pawimawh tak kan pen a, mahse inzirna tur erawh kan la nei tam.” tiin an inkhel chungchang a sawi zui.
Group C inkhel lehlamah Turkish club Besiktas in Sporting CP an mikhual a. 4-1 in mualneitu an tlawm.
Istanbul a Vodafone Park-ah Uruguay defender Sebastian Coates chuan mikhual lam tan goal hnih a khung a. Pablo Sarabia leh Paulinho ten goal an khung belh bawk.
Besiktas tan Cyle Larin chuan Coates-a goal hnih inkarah goal khat a khung ve bawk a. Sporting in point thum an hmuh vangin knockout stage beisei ngamna an la nei.