Ei ruk thubuai chhuitu Mizoram Lokayukta chu kum 2 leh thla 8-a upa ni tawh mahse inquiry wing an la nei lo a, thil an chhuinaah Anti Corruption Bureau (ACB) an hmang thin.
THE ZOZAM TIMES zawhna chhangin Mizoram Lokayukta Chairman C Lalsawta chuan an hnena thubuai theh luhte chhui tur bik inquiry wing an la nei lo tih sawiin, hemi avang hian thubuai an dawnte chu an zir chian hnuah chhui zui zel tlaka an ngaihte chu Anti-Corruption Bureau (ACB) ah chhui zui turin an thawn thin tih a sawi.
C Lalsawta chuan ACB nen hian thawhhona tha tak nei mah se thil chhui kawnga hma an lak chak theih nan inquiry wing a hrana neih vat thei an duh hle tih a sawi a, "Inquiry wing a hrana kan neih loh avang hian thubuai kan chhuina kawngah a chet chak theih loh," a ti.
Mizoram Lokayukta hian din a nih atanga tun thlengin thubuai 36 a dawng tawh a, chung zinga 10 chu finfiahna mumal a awm loh avanga tihtawp a ni.Lokayukta Act-ah chuan Lokayukta-a thubuai lut reng reng chu ni 45 chhungin preliminary inquiry tih zawh tur ni mahse ni 45 chhungin inquiry report theh luh theih vek a ni lo tih C Lalsawta chuan a sawi.
Mizoram Lokayukta chairman chuan Covid-19 hri leng avangin thubuai an chhui chak thei lo tih a sawi a, inkharkhip te kalpui a, an office awmna hmun te containment zone-ah te puan a ngaih changte a awm thin a vangin hearing neihna kawngah te harsatna an tawh phah tih a sawi bawk.Lokayukta hi chief minister atanga a hnuai lam minister dang zawngte hlemhletna laka inhnamhnawih nia hriatte chungchang chhuitu tur leh hremna pe theitu tur a ni.
February 6, 2014 khan Lokayukta Draffting Committee-in Mizorama hman tura Lokayukta Act an duan chu an lo pawm tawh a, sum hman turte pawh budget-ah dah thin ni mah se, chhan hrang hrang vangin a hlawhtling mai thei lo a, March 11, 2019 khan tuna chairman ni mek hi lakluh a ni a; Mizoram Lokayukta hi a takin kalpui a ni ta a ni.