EDITORIAL – 21/10/21


Chak lakna kawng dang kan la dap sauh sauh zel a tul hle

Assam leh Mizoram ramri buainain reh lam pan deuh tawh niin lang mah se, thenawm state hian engtiang chiahin nge min rawn nawk chhoh leh ang a hriat loh a, an lo khawsak tawh dan thlirletin ngawi an dawh rei hi a rinawm loh viau. Vai ze dik tak hmang pawhin hma an la leh lovang tih lah a hriat hek loh. Muangleia lo awm thei ngawt kan ni lo e.
Ramri buaina reng rengah hian Assam lam hi buaina chawk chhuak hmasatuah an tang deuh ziah tih pawh kan hriat vek tawh hnu a ni. Mizoram chak lakna pawimawh tak kawngpui tichhia a, an dang ping leh hmak duh thinte hi a huathlalaawm tak zet a. Sorkar tan pawh en liam mai mai chi niin a lang thin lo.
Assam lamin Mizoram chak lakna kawngpui dang a, ei leh bar kawngah hrek thei tura an inngaihna tak hi ngaihtuah tham a tling a, a thinrimthlak takzet tawh a ni. An tel lova nung thei lo turah min ngai tihna a ni a. Riltamin thi vek mah ila an pawi ti lo tawp tih a chiang reng. Tunhma atang tawhin hei hi an chapona leh min zuamna a ni reng a ni.
Chutih rualin, mi thenkhatin an sawi angin nitin ei leh bar chawk luhna kawngpui dangin hma lain, a hun laiin pawrin che rawva viauah inngai thin mah se rei an daih hi a rinawm loh zawk zel a. In mamawh tawn reng kan nih miau avangin, an lu chungah meiling an chhekkhawl a nihna lai hi a awm ve tih kan hriat ve kar tawh a tha hle. Tuang tihchhah luih ve deuh a, hnung kan chhawn lui ve ngam a nih ngat chuan anmahni leh anmahni inkarah hem thlak thei dinhmunah kan ding ve reng a ni tih kan hriat a pawimawh hle.
Chutiang chu kan boruak vel a ni chho a, hei tak hi Mizoram sorkar hian remchangah lain Assam state atanga chakkhai lakluhna ringawt ni lo, thenawm state dang atanga buai thulha kan tlan theihna tur hi ngaihtuah hmasakah nei reng se la, chutiang tur chuan kan inkalpawhna kawngpuite pawh hi thuam tha sauh sauh reng teh se. Chuti a nih loh chuan buaina ngaiah bawk let leh thinin, hmasawn zawngin kan khawsa thei lo a ni palh ang.

Leave a Reply

Your email address will not be published. Required fields are marked *

error: Content is protected !!