UEFA Champions League : Group A-ah City leh PSG chak

Manchester City in Belgian club Club Brugge tlawhin goal nga khungin point thum nen an haw a. Pep Guardiola pawlte hian team pahnihte theihna inthlau chu chiang taka lantirin hnehna an chang.

Jan Breydelstadion-ah mikhual team hi inkhel tan atanga chungnung nghal an ni a. An football rang leh hlauhawm tak chu mualneitu lam tan ven tluan huphurhawm a ni nghal thuai.

Mahse goal hmasa ber khung turin darkar chanve an nghah a ngai a, an tlarhma lamin a hmawr an bawk that theih loh thin laiin minute 30-naah wing-back Joao Cancelo chuan Phil Foden-a ball tha tak chu goal-ah a chantir.

Halftime dawnah Riyad Mahrez-a’n penalty atangin an goal hnihna a khung a, amah hlawhchhuah goal-ah a chantir.
Halftime zawhah City an inthlahdul lova. Mahrezz-a’n Kevin de Bruyne nen inkawpin Brugge tlarhnung an thiat a, Kyle Walker-a’n an goal thumna a khung.

Kum 19 mi academy chhual Cole Palmer tan huntha inher chhuakin khelmual a dah luh a nih atanga minute hnih hnu lekah an goal li-na a khung a. Brugge star player Hans Vanaken chuan City goal-ah vawikhat khung ve mahse City in an chhanglet lehnghal vat a, Mahrez bawkin an goal hnuhnung ber a khung.

City hi Paris Saint-Germain lakah an inkhel hmasa zawka an tlawm hnuah an tho lehnghal a. French club hi point khatin an group-ah an pha lo mek.

Inkhel zawh lam
Manchester City manager Pep Guardiola chuan an inkhel a thlirlet a, “Europe a kan inkhelh that ber tum zingah a tel ngei ang. Inkhel kan thunun a, ball kan chuh taima. Ball kan chanin awmze neiin kan hmang a chance tha tam tak kan siam.” a ti a.

Rawlthar Palmer a fak rualin enkawl uluk a ngaih thu a sawi. “Cole hian theihna danglam bik a nei a, penalty area chhungah talent mi tam takin an neih loh a nei. Mahse player naupangte zinkawng hmabak hi ka hrechiang a, dawhtheih a ngai.”

“Mi tam tak rilru a hmanhmawh thin a, mahse thil tha nei tur chuan dawhtheih a ngai.” a ti.

PSG chakpuitu Messi
Paris Saint-Germain in Lionel Messi goal hnih khung hmangin German club RB Leipzig 3-2 in an hneh a. Hniam zawk an nih hnuah an khingpui an lehthal.

Parc des Princes-ah PSG hian minute 8-naah counter-attack hlauhawm atangin goal an khung a. France forward Kylian Mbappe-a’n goal a khung. Mahse minute 28-naah German team in an si phurh an sut a, Brazilian wing-back Angelino ball cross atangin Andre Silva chuan goal a khung. Second half-ah pawh Angelino ke atang bawkin goal an khung a, Nordi Mukiele goal tur Manchester City player hluiin a siamsak.

Minute 67-naah Messi-a goal khung tur goal banah dan per a ni a, a per atang erawh khung thovin Argentine forward in a goal hmasa a khung a. Minute sarih hnuah penalty atangin an goal thumna a khung leh bawk. PSG hian huntawp dawnah penalty an hmu leh a, hemi tumah hian Mbappe zawkin pet in a khung lo.

Inkhel zawhah France forward chuan, “Khawvela player tha ber a ni a, kan zinga a khel hi kan tan thil lawmawm a ni. Hei hi ka sawi fo tawh thin. Penalty kan hmuh chuan a pet tur a ni, a vawihnihna kha chu pet rawh min ti a ka pet.” tiin thutlukna a sawifiah.

Messi hian PSG a zawm hnua goal thum a khungte hi Champions League-ah vek a la ni a. Kum 34 mi hian Champions League goal 123 a khung tawh a, Leipzig hi UCL-ah team hrang 37 laka goal a khungna a ni bawk.
Manager Mauricio Pochettino chuan, “Kylian leh Leo te thiamna hi sawi leh chuan a ngai tawh lo. Inkhel thenkhatah team anga danglamna siam kan harsat laiin anni ang theihna nei player kawl hi kan mamawh a ni.” a ti.

Leave a Reply

Your email address will not be published. Required fields are marked *

error: Content is protected !!