NBA season thar – Champion lai Bucks in chakin bul tan

NBA champion Milwaukee Bucks in Nilaini zinga NBA season thar inkhel hmasa berah hnehna nen bul an tan a. Kumina Eastern Conference a an elpui ber tura ngaih Brooklyn Nets 127-104 in an hneh.

NBA in kum 75 a tlin champha pualin tun season hman a ni dawn a. NBA champion an nih an lawm zanah Bucks tan thil a danglam lova, season liamta a an thiampuipa Giannis Antetokounmpo bawk langsarin an inkhel thlirin tun season-ah pawh champion leh tura rin hlawh an ni.

Fiserv Forum Arena-ah Bucks tan Giannis-a’n point 32 leh rebound 14 a la a. Khris Middleton chuan point 20 a thkawp bawkin bench atang Bucks tan Pat Connaughton leh Jordan Nwora ten point 20 leh 15 an thawh.

Brooklyn Nets tan Kevin Durant chuan point 32 score in James Harden chu an ‘offense’ kaihruaituah a tang a, point 20 nei bawkin Kyrie Irving awm lo erawh team pahnih inkara danglamna a ni a. Patty Mills chuan point 21 score ve mahsela Nets offence-ah point score tu rintlak pathumna an nei lo.

Inkhel hnuhnung zawkah Los Angeles Lakers in Staples Center-ah Golden State Warriors an mikhual a. 121-114 in an tlawm.

Warriors tan Steph Curry chuan point 21 leh rebound leh assist 10 neiin a triple-double chu an chakna hnar a ni a. Jordan Poole chuan point 20 a thawh.

Lakers tan LeBron James leh Anthony Davis ten point 34 leh 33 an score a, Russell Westbrook erawhin point 8 chiah a nei.

Leave a Reply

Your email address will not be published. Required fields are marked *

error: Content is protected !!