Congress hruaitu, Priyanka Gandhi Vadra chu thla khat pawh tling lo chhunga a vawi hnih nan Uttar Pradesh-a police-ten an hreng leh ta.
Nilaini khan Agra-a police custody-a a awm laia mipa pakhat thi nia sawi chhungte tlawh tura a kal chu lo dan niin Lucknow-a Police Lines-ah lak a ni.
A car hi Lucknow-Agra Expressway-a toll plaza hmasa berah lo tihdin a ni.
“Inah ka awmin a pangngai, pisa ka kai pawhin; mahse, ka chhuak hleka heti hi a ni zel mai, engvang nge? Mi ka hmu dawn a ni mai a, a atthlak luituk, mi tam tak a nghawng asin,” tiin a hnung lama lirthei tam tak ding chu a kawk.
Gandhi Vadra-i hian dan hnuaiah ram chhung khawiah pawh kal theihna a nei tih a sawi a, an chhuah veleh a kal tumnaah chuan a kal dawn tho tih a sawi bawk.
Tihdin a nih hnu lawkah hian Twitter-ah sorkar chuan eng nge a hlauh em em tih a zawt bawk.
“Police custody-ah Arun Valmiki a thi a, a chhungten dikna an duh a, ka tlawh duh a ni. UP sorkar hian eng nge a hlauh, engvangin nge min tihdin? Vawiin hi Lord Valmiki Jayanti a ni a, PM Modi-an Buddha chungchang a sawi dum dum a; mahse, min tih dan hi a thu sawi beih letna a ni,” tiin Hindi-in a tar lang.
Police-te hian Agra District Magistrate hnen atanga thu an hmuh anga tiding an nih thu an hrilh a, ani hi politics-a hruaituten khawpui an tlawh tur dang theitu a ni.
An indan lai thlalakah chuan Gandhi Vadra-i hi police leh mi dang tam takin an hual a, kaltlang a tum a. A car hmaa police ding, a car chunga nem lai pawh a lang bawk.
Video pakhatah chuan Congress hruaitu leh police inbiakna a lang tel a, “Ka kalna apianga phalna ka lak hmasak a ngai em ni?” a ti a, officer chuan ‘dan leh thupek an hmuh ang’ a nih thu a hrilh.
“Kan buaina hi eng nge? Mi an thi a, khawnge dan leh thupek tihchhuah chu, min hrilh rawh…,” a ti let.
UP Police chuan Nilaini zing khan an kuta awm lai, Valmiki chu a thih thu an puang.
Senior Superintendent of Police (SSP) Agra Muniraj G chuan Thawhlehni zana an chenna ina an man laiin a khua a sik a, damdawi ina hruai a nih hnuah doctor-ten a thi tih an lo sawi tih a sawi.
Valmiki-a hi Inrinni zana police-in an luah lai awmna building-a kudam pakhatah mi pawisa ruksaka puh niin a ruksakna hmunah hian thil tifaia thawk a ni.