Toyota Innova Crysta Limited Edition tlangzarh
by ruata
Toyota Innova Crysta Limited Edition hi a man angah chuan sawi tawh angin thil changkang an rawn dah belh nual a. Innova Crysta lei tum mek tan chuan duhthlan tur tha tak a ni dawn a, MPV huang lirthei hoah chuan India rama hralh tla ber pawl a nih angin duhthlan tur tha tak a ni
Toyota chuan an Multi Utility Vehicle (MUV), Multipurpose Vehicle (MPV) tia sawi bawk huanga mi, an lirthei hralh tam leh India ram chhunga hman nasat em em Innova Crysta chu a chu thar Limited Edition an tlangzarh.
Toyota Innova Crysta Limited Edition hi tun India ram hunpui chhunga lirthei leitute mit a lak zual nan tih theih turin tlangzarh a ni a. A man tur hi petrol khawl hmang Rs. Nuai 17.18 man leh diesel hmang Rs. Nuai 18.99 (ex-showroom) man atangin a intan dawn a ni.
Hei hi Toyota Innova Crysta chhuak meka a laihawl variant ho, GX ho nen a inang vel dawn a. He limited edition erawh hi chu a edition nihna ang hian reilote chauh a chhuak dawn a ni.
Toyota Innova hi India ramah chuan khualzin phurhna leh mi pawimawhte phurh nan hman a ni nasa em em mai a. Mizoramah pawh hian chutiang atana hman a ni bawk a, mimal hman tura lei pawh tam tak an awm.
Limited Edition ah chuan eng nge awm thar le?
Toyota Innova Crysta Limited Edition-ah hian kentel hrang hrang a awm thar a. Tuna chhuak mek kan tarlan tak, a tlukpui deuha ngaih GX trim hoin an neih aia tha fe a nei a ni. A kentel ho zingah hian multi terrain monitor (360 degree camera), headup display, tyre pressure minitoring system, a dashboard-ah wireless phone charger, door ambient light thar rawng chi 16 duhthlan tur nei, air ioniser leh thildang te a nei ang.
Heng bakah hian GX trim hoin a lo kentel sa tawh 8.0 inch touchscreen infotainment system Android Auto leh Apple Car Play kengtel, electric folding OVRM, tilt and telescopic steering, ABS, Hill Start Assist, Vehicle Stability Control leh adangte a keng tel bawk dawn e.
A pawn lam design-ah hian Innova Crysta chhuak mek, nikuma tlangzarh model ho nen khan a inang viau a. He design-ah hian trapezoidal grille lian tha tak, chrome a kual, bumper a hnuailam rawn poh chhuak deuh te, faux skid plate leh 16 inch diamond cut alloy wheel te a tel.
A khawl
A khawl lamah hian Toyota Innova Crysta Limited Edition hian tuna chhuak mek petrol leh diesel khawl ang a rawn tawm dawn a. Petrol bik hi 166hp power pechhuak thei 2.7 litre khawl a ni a, diesel hi 2.4 litre, four cylinder, 150hp power pechhuak thei a ni. Heng khawl pahnihte hi 5-speed manual leh 6 speed torque converter automatic gearbox te duhthlan tur a awm a ni.
A elpui
Toyota Innova Crysta Limited Edition hian Innova Crysta in a lo elpui sa ni mek Maruti Suzuki XL6, Mahindra Marrazo, MG Hector Plus, Kia Carnival tih te ho a ni a. Tata Gravitas lo chhuak tur nen pawh a rawn inel thei dawn a ni.
Toyota Innova Crysta Limited Edition hi a man angah chuan sawi tawh angin thil changkang an rawn dah belh nual a. Innova Crysta lei lo tum mek tan chuan duhthlan tur tha tak a ni dawn a, MPV huang lirthei hoah chuan India rama hralh tla ber pawl a nih angin duhthlan tur tha tak a ni dawn a ni.