Tuirial bial bye-election campaign boruak a sang ta hle a, party hrang hrangin an candidate a tlin ngei theih nan thapui an chhuah chho mek.
Polling station 27 awmna, Tuirial bial bye-election a hman tur electoral roll thar bera a lan danin Tuirial bialah voter 17,911 an awm a, MLA inthlan hnuhnung ber, kum 2018-ah voter 17,003 awmin voter 908-in an pung a. Mizorama MLA inthlan hmasa ber, 1972-ah he bialah hian voter 6,624 awmin, kum 49 chhung, kum 1972 MLA inthlan atanga kumin October thlenga he biala voter punna chu 11,287 a ni.
Tun thla ni 30-a bye-election neihna tur bialah hian vote sang chuang awmna khaw pali awmin, Kawnpui-ah voter tam berin, Kawnpui VC II huam chhunga awm, Mualvum-a voter 558 nen Kawnpui-a voter awm zawng zawng 5,217 a ni a. Hortoki-in dawtin, Hortoki VC hnuaia awm, Zodin-a voter 744 nen voter 2,842 an awm. Voter tam lama pathumna Thingdawl-ah voter 2,232 awmin, Lungdai-ah 1,513 an awm bawk.
November ni 28, 2018-ah Mizorama MLA inthlan vawi 12-na leh state nih hnua MLA inthlan vawi 8-na chu neih a ni a, Tuiral bialah hian ZPM party atanga Independent-a ding Andrew H. Thangliana thlan tlin a ni a. Andrew H. Thangliana’n August 17, 2021-ah vanduaithlak taka chatuan ram a pan tak avangin Tuirial bial chu bial ruak a lo ni ta a, bye-election neih a lo ngai ta a ni.
Union Territory-a Mizoram hlan kai a nih hnua inthlan hmasa ber, kum 1972, April 8-ah neih a ni a. Hetih hunlai hian tuna Tuirial bial ni ta hi Kawnpui bial tih a ni. 1972 inthlanah hian Kawnpui bialah Mizo Union candidate Ch. Saprawnga thlan tlin a ni a, Kum 1978, May 17 leh 20-ah MLA inthlan awm lehin, PC party candidate Kenneth Chawngliana thlan tlin a ni.
PC sorkar a buai avanga November 10, 1978-a Mizoram chu President’s Rule-a dah a nih hnuah April 24 leh 27, 1979-ah MLA inthlan neih leh a ni a. Kawnpui bial atangin PC candidate Kenneth Chawngliana bawk thlan tlin leh a ni.
Union Territory-a MLA inthlan vawi 4-na leh a hnuhnung ber chu April 25, 1984-ah neih niin, Kawnpui bialah hian Congress candidate Vaivenga thlan tlin a ni.
Mizoram state-a a nih hnua inthlan hmasa ber, February 16, 1987-a neihah Kawnpui bialah MNF candidate Lalkhawnghinga thlan tlin a ni a. MNF sorkar a tluan loh avangin September 7, 1988-ah Mizoram chu President’s Rule-ah dah a ni leh ta a, January 21, 1989-ah inthlan buatsaih leh niin, Kawnpui bialah Congress candidate Vaivenga thlan tlin a ni ta thung.
Tun hma lam thil
Union Territory
1972: Ch Saprawng, Mizo Union
Vote hmuh zat : 2,305
Vote awm zat : 6,624
Vote tla zat : 5,058
1978: Kenneth Chawngliana, PC
Vote hmuh zat : 2,102
Vote awm zat : 9,259
Vote tla zat : 6,185
1979: Kenneth Chawngliana, PC
Vote hmuh zat : 2,336
Vote awm zat : 9,950
Vote tla zat : 7,007
1984: Vaivenga, INC
Vote hmuh zat : 2454
Vote awm zat : 7597
Vote tla zat : 6707
State
1987: Lalkhawnghinga, MNF
Vote hmuh zat : 2814
Vote awm zat : 9422
Vote tla zat : 7383
1989: Vaivenga, INC
Vote hmuh zat : 2,854
Vote awm zat : 9,029
Vote tla zat : 7,756
1993: RL Valla, INC
Vote hmuh zat : 3,680
Vote awm zat : 9,921
Vote tla zat : 8,333
1998: Sanghmingthanga Pautu, MNF
Vote hmuh zat : 2,819
Vote awm zat : 10,649
Vote tla zat : 8,740
2003: Sailothanga Sailo, MPC
Vote hmuh zat : 4,163
Vote awm zat : 12,969
Vote tla zat : 10,632
2008: Hmingdailova Khiangte, INC
Vote hmuh zat : 4,717
Vote awm zat : 14,538
Vote tla zat : 11,930
2013: Hmingdailova Khiangte, INC
Vote hmuh zat : 5,119
Vote awm zat : 15,718
Vote tla zat : 13,125
2018 – Andrew H Thangliana, Ind./ZPM
Vote hmuh zat : 4,387
Vote awm zat : 17,003
Vote tla zat : 14,245