India hmar lam, Uttarakhand state-a ruah sur nasa tak avanga tui lian thutah mi 46 vel an thi tawh.
Thlalak leh video thehdarhah chuan tui hian kawngpui, chenna in leh lei tam tak tichhiain a la tih a lang thei.
Mi thiamte chuan khualzinte tlawh nasat tak, Himalayan state-in heti taka khuarel chhiatna an tawk hi sik leh sa inthlak nasa lutuk vang leh ram tichereu zawnga hmalakna a tam vang niin an sawi.
India-ah hian chhim lama Kerala pawh a tibuai nasa hle a, mi 26 velin tun hnaiah an thih phah tawh.
Heng state pahnihte hian kuminah hian an dawn thin ang aia tam fe ve ve ruahtui an dawng tih India-a weather department chuan an sawi a. Kerala-ah hian ruah mm 453.5 zet dawng tawhin kum danga an dawn thin chawhrual erawh mm 192.7 chauh a ni thung.
Uttarakhand hian October thlaah hian ruahtui mm 30.5 vel dawng thin ang an nih laiin darkar 24 lek chhungin mm 122.4 zet an dawng hman thung a. Hetih lai hian khawchin zirtute chuan Thawhlehni atang khan ruah sur nasa zualpui chu a han tan tawh dawn niin an sawi.
Police hotu lian, Nilesh Bharne chuan chhanchhuah hna chu a tuar na zual hmunah thawh chhunzawm mek zel a nih thu a sawi.
National Disaster Response Force (NDRF) chuan team 16 tir lutin mi 300 chuang an chhanchhuak tawh.
Chief Minister Pushkar Singh Dhami chuan khuarel chhiatna avanga thi chhungte chu Rs. 4,00,000 theuhva sorkarin a ral tur thu a sawi a, chenna in chhiate pawh zangnadawmna Rs. 1,90,000 an pek dawn thu a saw bawk.
Prime Minister Narendra Modi pawhin Uttarakhand-a chhiatna thleng chungchang hi Twitter-ah tar langin, “Ruah tam tak sur avanga Uttarakhand-a thihna thleng hi pawi ka ti em em a, hliam tuarte pawh dam chhuak leh thuai se ka duhsak a ni,” a ti.
Uttarakhand-a regional meteorological centre director Bikram Singh chuan tun hnaiah hun reilo te chhungah ruahpui vanawn sur chiam ang hi an state-ah a tam sawt hle niin Hindustan Times chanchinbu hnenah a sawi.
State chhung hmun tam takah weather station a awm loh avangin ruah bing sur an hriat loh a awm nual a ring bawk.
Mi thiamte ngaihdan
Mi thiamte chuan Uttarakhand-a tun hnaia ruahpui vanawn sur chiam chiam thin chu a ram hmelhmang tihdanglam nasat lutuk vangah an puh ber a. Tui lian thut thut leh lei min ang chi a tam phah niin an ngai a, a him lo niin an sawi.
Uttarakhand-ah hian Himalaya tlang sang chinah hydro-power project eng emaw zat an siam a, tlangram awihah a min leh lei che tur dalna siam tha leh chuang si?lovin in an sa a, thil lian an bun chiam chiam a, ruah a sur tamin nghawng lian tak tak a nei thei ta niin an ngai.
Himalaya-ah hian khua a vawt a, vur a tam tawh bawk si lo va, ruah a sur nasa hian tlang lam atangin tui a luang ta vak a, chu chuan tui lian thut ang chi a thlen tam niin an ngai bawk.
&&&&
Bangladesh-a rorel laiten Hindu-te tawrhna duh lohna lantir
Bangladesh-a rorel lai party chuan tun hnaia an rama sakhaw zuitu tlem zawk, Hindu-te tawrhna an duh lohzia leh an demzia tihlanna an huaihawt.
Tun tuma Muslim rama sakhaw tlem zawkte tawrhna hi kum 10 chuang chhunga he rama a nasat ber tum a ni.
Muslim leh Hindu inkara buaina chhuakah hian tual chhung chanchinbute chuan mi paruak an thi niin an tar lang a, an zinga pahnih chu Hindu mipa an ni a, chenna in tam tak a chhe bawk a. Police chuan mi 450 chuang an man tawh.
Hindu-te beihna hi Zirtawpni atanga intan kha niin Muslim za rualten an ram chhimchhak lam, Noakhali district-ah Hindu-ten Islam sakhaw lehkhabu thianghlim, Quran an tibawrhbang nia sawi awm an hriat atang a ni.
Hindu sakhaw biakna hmun leh an chenna in beih leh suasam a ni a, hal a ni bawk.
Prime Minister Sheikh Hasina-a kaihhruai, Awami League party mite chuan Thawhlehni khan an khawpui, Dhaka lailiah km lia thui kawng zawhin tharum thawhna thleng titawp turin an ngen.
Hmeichhe tel veten banner an ken pakhatah chuan, “Chi/hnam inkara buaina hi tawp nghal rawh se,” tih inziak pawh hmuh theih a ni.
Dhaka hmun dangah pawh ziak mite pungkhawmin kutziaka buaina an demna leh tawp tura an duhna te an pho chhuak bawk.
“I fa chu mi that dan ni lovin, hmangaih dan zirtir rawh,” tih inziak pawh hmuh theih a ni.
Muanna duhtute
Awami League MP ni lai leh Joint General Secretary hlui, Mahbubul Alam Hanif chuan an party worker-ten chawlhkar hnih lo awm leh tur chhungin an ram pumah tharum thawhna thleng duh lohna leh Hindu-te tanna tihlan an tum tih Reuters news agency a hrilh a, mipui chiaina chu tihtawp a ngai niin a sawi.
Bangladesh-ah hian mihring maktaduai 170 dawn cheng zinga 10% vel hi Hindu sakhaw zuitute an ni.
Thuneituten Hindu sakhaw kûtpui, Durga Puja laia thil thleng avang hian thubuai 71 an ziah luh tawh thu Bangladesh Police thupuangtu chuan a sawi.
Bangladesh-ah hian chi leh chi, sakhua leh sakhua intihbuaina hi a thleng fo tawh thin a, an ram danpui chuan Islam chu an ram sakhua angin a ziak a; mahse, mahni duh sakhua zui theihna (secularism) ang erawh an kal dan a ni zawk.
United Nations-a resident coordinator Mia Seppo chuan, “Tun hnaia Hindu-ten an tawrhna hi social media-a huatna lam thu sawi vanga intan a ni a, ram danpui kalhna niin tihtawp nghal ngai a ni,” tiin Twitter-ah a tar lang.
Mihring dikna chanvo humhalhtu, Amnesty International pawhin chhuia a bultumtute hrem ngei an phut bawk.