COVID-19 KA KAI
- PL Liandinga
Inrinni velah chuan ka ngui angreng deuh tlatin ka hria a. Mahse pension hnu hi chuan chhun mut chak mai mai chang ka nei ta zauh zauh a. Ka ngai thutak tehchiam lo. Chawlhni a lo nih chuan ka nuam lo chhunzawm zelin ka hria a. Ka awmdan chu ka sawifiah thiam chiah lova, a nuam lo a ni deuh mai. Mahse ka rim hriatna chu a bo tlatin ka hria a, chuvangin Covid an tih hi ka kai ve taah ka ngai hmiah a. Azethral damdawi an tih mai chu ka lam a, ka ei a. A tukah chuan in-test tur an tih avangin kan chhungkuain kan in-test nghal a. Kan nu leh kei chu kan lo positive ta chiah a. Kan positive lai tak hian kan nu chu engtin mah a awm ve lova, kei erawhchu ka la nuam lo deuhva.
Thawhtan a liam a, thawhleh a ni a, nilai a ni leh a, kan chhungkua chu kan inkhung a, kan kawngkhar pawh chu hawng mang lovin inchhungah chuan kan awm ta niai niai a. Kan kawngkhar pawn lamah chuan HOME ISOLATION tih thuziak lianpui an rawn tar nghal kulh bawk a. Mahse ningani a lo thlen chuan ka tha leh tawh khawp a, ka rimhriatna pawh chu ka nei leh ta mai a. Chuta tang chuan dam fe si, pawn chhuak ngam si lo leh chhuak thei si lovin ka awm a. Ka chhungte pawh chu inchhungah an tawm thap mai a. Kan chhungkaw chanchin sawi ka tum lo, keima chanchin leh ka tawn hriat ziah tum ka nih avangin ka chanchin chauh a ni sawi ka tum ni.
Ka taksaah chuan danglamna eng vak a awm ka hre lova, nitinin kan khawsik leh sik loh te, kan Oxygen level te leh BP te chu kan report ta tlauh tlauh a. Keimahah danglam teh vak a awm lo. Hri chu ka kai ve ngei a, mahse ka tha zui leh ta mai ni berin ka hria. Han sawi ropui tehchiam ka tum lova, sawi nep pawh ka tum chuang lo, mahse hri chu ka kai ve ngeiin a lang. Hetih chhung hian a tirah chuan kan fate chuan kan pindanah chaw te min rawn pe a, mahse a rei tak deuh chuan kan tlin lo a ni ber ang chu chaw te chu kan inpe ta chuang lem lova. Kan fate lah chu an han in-test nawn leh thin a, an ‘positive’ hlei thei bawk si lova. An hritlangin an awm te a nuam lova, mahse an in-test a, an positive thei tlat bawk si lova. Kan chenghova, chaw te pawh mahni thleng chawiin kan ei a, kan inhnaih lem lo bawk a, kan fate pathum chu kan hnawih ta lem lo ni berin a lang. Vawiin, kan kai atanga ni sawm hnu, fihlima ngaih tur kan nih tawh hnu thleng hian kan fate pawhin an kai lo ta zel a nih hi.
He hri hi inkai a awlsam hle mai a, keini pawhin khawi atanga kan kai nge ni ang tih ngaihdan engmah kan nei lo. Kan chhuak tlem em em a, kei chu hnathawkho kiangah nitin ka awm a, kan hnathawktute zingah kai an awm kan hre bawk si lova, khawi atanga kan kai nge ni ang tih chu ngaihdan kan nei thei ta lo reng a ni.
He hri hi kan kai avanga kan hriselna a buaina ai mahin hri avanga kan intihbuaina hi a buaipuiawm zawkin ka hre ta deuh hial a. Chawlhkar khat el euh mai chhungkua han inkhung chuan khawsak a buai duh dawn hlein ka hria a. Keini chu thenawmte zarah chawhmeh te kan nei ang phian lawi a. Eizawnna kawng ni se nitin inhlawh chi kan awm loh lai tak a ni a. Keini nupa phei chu ina awm mai mai hi kan hna a nih deuh ber tawh avangin eizawnna lamah chuan kan buai hranpa lo. Mahse keini ang chhungkua ni ve lo tan chuan buaina tur a tam thei hlein ka ring.
Kum upa leh natna benvawn khirh angreng tak nei chi tan chuan he hri hi a hlauhawm viau ngei ang a, mahse thalai tan chuan mahni inveng deuh ran chung chuan hlauh viau turah pawh ka ngai ta meuh lo. Hlauh loh vanga fimkhur loh emaw, ngaihsak loh emaw lam ni lovin hna te kan thulh phah nasa lutukin a lang. Kan thenawmah hri kai an awm a, an in satu vai te hnathawh te an han chawlhtir ngawt a. An chenna chhawng chung chung leh daih satu vai han chawlhtir ngawt chu a tulna tehchiam pawh tun thlengin ka hre lo.
Keima thlir vena atangin vairamah keini aia inveng fimkhur lo zawk vaiho zingah kai thar an tlem em em a, mahse keini chu kan kai tluah tluah mai a. Nitin hian a kai thar hi tam deuh deuh an puang reng mai a, North-East-ah hri kai lamah pakhatna te kan han ni thul. A mihring tam lamah kan ni lo nasa hle si. Doctor pakhatin min hrilh dan chuan, ‘First Wave-ah khan an kai a, an hriat loh hlanin an lo dam duak a, Second Wave-ah an han in-test a, an taksain hri do theihna a lo nei tawh a, kai an awm mang lo mai a ni ang,’ a ti a. Ka awih zawng tak a ni mai.
Keini Mizo anga in-Lockdown nasa, Curfew nen a tang kawp, veng tin kawi tina VLTF duty ang hi vairamah an awm pawh ka ring lo. Vairam lama kal te leh a awm mek thiante han biak pawhin keini angin an ham fet ve lo niin a lang a. Chuvangin keini hi a thawhkhatna lama kai kan awm loh avangin han in-test tak tak hunah kan lo kai ta chiam mai ni berin a lang a. Tam tak chu test lo ila, tha te tea dam ve mai tur leh awm mai tur kha kan buai phah ni ta deuh berin ka ngai. Fimkhur chu fimkhur ila, he hri hi heti lutuk hian i hlau lo teh ang u, kan buai rei tawh em mai.