Leicester City in Europa League Group C-ah hnehna chang turin an khingpui an lehthal a. An hmahruaitu ni turin striker thar Patson Daka a inlar a, goal li khungin 4-3 in Spartak Moscow lakah an chak.
Foxes hi tun season-ah Europa League-ah beisei angin an khel lo thin a, Nilaini zana Moscow a Otkrytie Arena ah pawh result a danglam dawn lo a ang hman hle.
Spartak in minute 11-naah Aleksandr Sobolev dan pial hmangin goal an khung a, Leicester City hian sutna huntha an hloh nual hnuah halftime dawnah Victor Moses-a thawhrah sengin Jordan Larsson chuan Spartak goal hnihna a khung.
Halftime hma in beiseina siam turin Daka chuan offside trap ven hman loh a tlanlutin Spartak goalkeeper Aleksandr Maksimenko goal-ah a khung a. Second half tan hnu lawkah Kelechi Icheanacho siamsak a khung zawm thuai a. Minute 54-naah goal khung lehin hattrick a siam.
Minute 79-naah striker tha a nihna lantirin James Maddison-a ball fing la in tihsual nei miah lovin goal a khung belh leh bawk.
Kum 23 mi Zambia striker hi Foxes in rinrawl Jamie Vardy kum tam tawh thlir chungin an lalut a. English striker hi an rin ber a la nih avangin Daka hi first team-ah mawhphurhna lian pek nghal an tum lo.
Tun season-ah match 5 khel tawhin tun kartawp khan Manchester United lakah a goal hmasa ber a lo khung tawh.