German champion in Pathianni liamta khan minute sarih chhungin goal li an khung a, Nilaini zanah minute 15 chhungin goal li bawk khung lehin 4-0 in Benfica an hneh.
Champions League Group E-ah Bayern hian match thum atanga vawi thum an chakna turin Estádio da Luz-ah hnehna an chang a. First half a goal an khung theih loh hnuah second half-ah dan reng theih an ni lo.
Robert Lewandowski leh Thomas Muller te goal khung pawm loh a nih hnuah minute 70-naah Leroy Sane-a’n freekick mawi a khung a. Benfica substitute Everton-a’n an lamah tilutin Sane-a’n goal a khung nawn hma in Robert Lewandowski chuan tun season-ah a goal 16–na a khung.
Julian Nagelsmann-a pawlte hian inelna hrang hrangah tun season-ah goal 52 an khung tling der tawh.
Group E inkhel dangah Barcelona in Champions League season bul an tan chhiat ber tum an hmanlai mek chu a tha lam hawi turin result an nei a. Dynamo Kiev 1-0 in an hneh.
Camp Nou-ah Barca tan Gerard Pique chuan goal a khung a. Blaugrana in Champions League inkhel an hmachhawn hnuhnung panga atanga vawi li an tlawm hnuah hnehna an chang ve leh a ni.