Information Technology Act (IT Act)(National Cyber Security Awareness 2021)

Information Technology Act (IT Act)
(National Cyber Security Awareness 2021)

  • Chhungpuia Renthlei, Technical Officer, NIELIT Aizawl

October thla hi kum 2003 atang khan kumtin khawvel pumah National Cybersecurity Awareness atan an hmang thin. Kumin 2021 hian Cybersecurity lamaa mitin ten kan mawhphurhna engemaw tala kan tih ve theih dan inzirtirna “Do Your Part. #BeCyberSmart” tih thupuia hman a ni.Hemi pual hian Information Technology Act( IT Act) chung chang han tarlang ve lawk teh ang.
IT Act chu Internet, computer/smartphone leh electronics hmanraw hrang hrang hmanga pawikhawihna (cybercrime) leh internet hmanga sumdawnna (electronic commerce) chung changa inkaihhruaina dan leh pawikhawihtute hremna dan hi a ni.

IT ACT rawn pianchhuah dan:
Kum 1990 chho atang khan khawvel ram hrang hrang sorkar leh company lian ten Internet hmanga sumdawnna (e-Commerce) an intihhmuh chho zel a, shopping website an siam a, document pawimawh thahnem tak an upload a, email hmangin an inthawn a. ram hrang hrangah internet hmangin an inzarpharh zela. Sorkar inrelbawlna kalphung thar “e-Governance” leh sumdawnna kalphung thar “e-commerce” chuan internet kaltlanga pawikhawihna a rawn pian tir ve bawk a.Heivang hian inkaihhruaina mumal tak neih chu tihmakmawh a lo ni ta.
Tichuan, khawvel ram hrang hranga sumdawng te inkaihhruaina Model Law on International Commercial Arbitration (1985) chu an siam tha (ammend) a.Computer leh internet venhimna dan leh electronics media hmanga document pawimawh leh digital signature official a pawm, inthawnchhawn leh dahkhawm chung changah dan mumal tak an siam a.12 June 1996 khan United Nations Commission on International Trade Law (UNCITRAL) in a pawm pui hnuah Internet kaihhnawih chung changa inkaihhruaina dan thar khawvel pum huapa hman tur “Model Law on Electronic Commerce (MLEC) chu UNCITRAL hnuaih a rawn piang ta.

IT Act 2000
India sorkar pawhin MLEC zul zui hian IT kaihhnawih services (e-commerce, e-governance, e-banking e.t.c) chung changa inkaihhruaina dan leh thil tisualtu te hremna dan “Information Technology Act ” a duang ve nghal a.IT Act ah hian 13 chapters (bung) leh 90 sections(Chang) a awm a. A tawp lam section 91-section 94 ah hian Indian Penal Code ennawnna dah a ni bawk. India rorelna sang Parliament in 9th June 2000 a an pass hnuah President pawmpuina in October 17, 2000 atang khan Information Technology Act (IT Act 2000) chu India ram pumah hman a lo ni ta.
Tin, IT Act 2000 hi hmanhmawh taka “Model Law on Electronic Commerce (MLEC)” zulzuia buatsaih anih avangin thil tul tam tak hmaih a tam hle. IT Acts 2000 in ahuam loh cyber crime a rawn piang chho ve zel bawk nen reilo te ah duhthusam lohna vanga, inhnialna tam tak a awm a. Chung zinga langsar zual te chu:-IT kaihnawih infrastructures te hi venhimna khauh tak nena hman anih theih nana khuahkhirhna dan tha zawk a siam te, IT services (e-governance, ecommerce, e-transactions) leh mimal data pawimawh venhimna tha zawk siam te, Mimal data pawimawh ruk chhuah kawnga sualna (Fraud,phishing, identity theft e.t.c) venhimna leh hremna dan khauh zawk te,digital signatures leh IT kaihnawih service providers chungchangah te ennawn leh siam belh ngai tam tak a awm a ni.

IT Act 2008
IT hmasawnna a thang chho zela, sualna (Cyber Crime) pawh a pung chho zel bawk nen ‘Cyber Crime’ khuahkhirh tak tak tur chuan IT Act mai bakah dan chi hrang hrang Indian Panel Code te, Copy Right Right Act te, Indian Evidence Act e.t.c kan mamawh a.Tichuan, vawi engemaw zat an ennawn a, Data privacy & information security laws, cyber café, rational data security practices, Indian Computer Emergency Response Team leh cyber crime chhhuitu te thuneihna pek chungchang te telh belh a ni a. Tin, computer, mobile leh internet hmangtu te him nana inkaihhruaina dan leh hremna dan siam that leh IT Act 2000 in a huam loh engemaw zat siam belh anih hnuah October 27, 2008 khan Lok Sabha ah Information Technology Act 2008 pass ani a, 5th February 2009 ah President Pratibha Patil pawmpuina in ram pumah hman a lo ni ta a.

Dan bawhchhiatna leh Hremna
IT Acts 2008 hmanga dan bawhchhiatna leh hremna langsar zual te chu :
Nuaih khat thleng chawitir leh kum 3 thleng jail tan theihna te.

  1. Computer leh electronic bungrua ruk leh lei(Section 66B )
  2. Midang signature, Id leh password ruksak (Section 66C)
  3. Computer hmanga mi bum (66D) Zahmawh rawngkai phochhuah leh thawndarh (Section 67A ) leh Kum tlinglo naupang zahmawh rawngkai phochhuah leh thawndarh (Section 67B ): Kum 5 thleng jail tan leh Nuaih khat thleng chawi theih an ni a, an ti nawn leh anih chuan Kum 7 thleng jail tan leh Nuaih khat thleng chawi theih a ni. A neitu phalna lova document pawimawh ( book, record, information) lakchhuah leh thehdarh (Section 72) : Nuaih khat thleng chawi leh Kum 2 thleng jail tan theih a ni.
    Inremsiamna (Lawful contract) midang hriat loh tur chi Confidentiality Agreements puanzar (72A) : Nuaih 5 thleng chawi leh Kum 3 thleng jail tan theih a ni. Digital signature Certificate lem thawndarh (Section 73) : Nuaih khat thleng chawi leh kum 2 thleng jail tan theih a ni.Tin, Section 66F in a tarlan danin India ram inpumkhatna leh himna ti chhe thei tura sorkar, chi bing, pawl, ram bial e.t.c computer resources tihchhiatsak emaw, hnathawk theilova siam te, information, computer database khawih leh ruk ang chi te hi damchhung lungin tan theih a ni.

Information Technology Rules
Kum 2010 hnulamah Smartphone leh computer kan hmang uar zel a, internet leh Social media hmangtu kan pung zel a bawk a. ICT hmanga sorkar hmalakna te, e-commerce te, electronics financial transaction te kan hmang nasa em em a, hei hian cyber crime a tipung ve zel a. ITAct 2008 ah pawh hian duhthusam lohna a awm chho ve zel a. Cyber crime pung chak lutuk hi a veng hneh lo a, hremna pek kawngah pawh harsatna atam hle. online-a thil post avanga man theihna dan, Information Technology Act-a Section 66A chu Supreme Court chuan freedom of speech a kalh ani tiin 24th March 2015 a lo hnawl tawh bawk.Amaherawh chu kan zalenna hi midangte dawt hmang emaw thudik chanve hmanga tihmualpho nan kan hmang thiang lo a ni.
Ministry of Electronics and Information Technology (MeitY) leh Ministry of Information and Broadcasting (MIB) hmalakna in kumtin IT Acts siam that leh belh thar a awm reng thin. Kumin kum tir khan rules thar ber Information Technology Rules, 2021 pawh duan a ni. He rules ah hian Digital Media Ethics Code, Social media (Facebook, WhatsApp) inkaihhruaina leh hremna dan hrang hrang telh a ni a,hremna pawh a neplo hle.

Do Your Part. Be Cyber Smart.
National Cyber security Awareness month ah hian mahni awmhmun atanga kan tih ve theih a awm teuh mai. Nangma himna mai bakah midang himna ngai pawimawh la, Online banking, social media (Fb, Twitter, insta .e.ct) password thuam tha la. software leh antivirus update la, file leh data tullo paih la, personal data pawimawh digilocker (https://www.digilocker.gov.in/) han backup ve rawh le. Cyber security Awareness hi October thla mai bakah kumtluanin ngai pawimawh ang u.

Leave a Reply

Your email address will not be published. Required fields are marked *

error: Content is protected !!