Manchester United in ‘comeback’ an mamawh leh tawh

Thawm ring tak neiin season bul an tan a, player langsar pathum lalutin an squad thawm thatna ngawrh takin an kalpui bawk avangin Manchester United lakah beiseina a sang. Mahse tunhnaiah an che fuh hleithei lo thin a, Atalanta lakah pawh an buai leh hman viau chungin ‘United’ zia lantirin second half-ah an sual let a. Ole Gunnar Solskjaer-a pawlten 3-2 in hnehna an chang.

First half-ah zero
Old Trafford-ah hian halftime-ah Red Devils hi an fans thenkhatin an au el hial a. Mario Pasalic leh Merih Demiral te goal khung avangin si hnih phurin chawlhlawk an hmang.

United hian Atalanta player thawkrimte hmaah an duh ang football an khel hleithei lo thin. An tlang ve tum pawhin ‘high press’ hmang thiam Gian Piero Gasperini pawlten a hmawr an bawk tluantling hma in an tibuai hman thin a. United hi goal hmaah an hriam tawk lo.

A hnung lamah an buaina a la ngai thung a, an tlarhnung in set piece ven an la thiam lo tluang a, minute 28-naah hliam nei chunga khel lui Demiral tauh goal tur an veng hneh lo.

Minute 15-naah Mario Pasalic-a’n goal hmahruai a khung a. United in defensive midfielder rintlak tawk an neih loh zarah Davide Zappacosta chuan hlauhawm takin mual sirah ball a luhpui a, Pasalic-a’n a cross hlauhawm goal-ah a chantir.

Second half-ah hero
United in chawlhlawk an hmang tangkai a, an khel chhe lo a ni tih infuih nawnin second half a an football khel a huai sawt. Lehlamah Atalanta an zam thar ta thut emaw tih turin an ‘high press’ an khel fuh hleithei lova, Red Devils in a awl lai an zawng huai telh telh. Minute 53-naah a forward-te zawng ngun tak Bruno Fernandes-a ball tha pek atangin Marcus Rashford-a’n match hnih atanga a goal hnihna a khung.

Minute 75-naah captain Maguire-a’n an khingpuite muthlu kaithovin an ven loh zarah an si phurh a sut a. United an phur telh telh.

A tawpah erawh mi pakhat bawk a lang a, chu chu Villarreal laka an chakna goal lo khung tawhtu Cristiano Ronaldo bawk niin minute 81-naah Champions League a goal khung hnem ber forward hian Luke Shaw ball vawrh luh duhthusam chu kheltha Juan Musso goal-ah a tauh lut.

Inkhel zawhah Ole-a’n an inkhel thlirletin, “First half khan kan khel chhe lo, chance vawi hnih an neih an khung a, hetiang hi he club-ah hian kan tawng ngun. Kan kal zel dawn a nih chuan heng hi kan thlen tir tawh loh a ngai.” tiin a sawi a. “Kan thunun zawk laiin goal an khung a, set piece an hmang tangkai leh bawk. Mahse kan player-ten kan chak thei a ni tih ringhlel miah lovin an bei tlat.”

“Halftime laiin goal lut leh hmasa ber kan khung a nih chuan kan chak tur thu hrilhin ka fuih.” a ti.

Leave a Reply

error: Content is protected !!