European champion ni lai in match hmasaah tlawm mahse tun season-ah an lallukhum chhuhsak tumte tan an kut atanga sualchhuah a ngai dawn tih lantirin vaukhanna thawm lian tak an chhuah a. Malmo lakah an beisei ang vekin inkhel kal lo mahse goal li an khung.
Chelsea hi Turin-ah matchday 2 khan Juventus lakah an tlawm a, tun tumah erawh inkhel danglam hle in an Swedish mikhualte hi kawng engkimah an thunun.
Stamford Bridge a inkhel atang hian chanchin lawmawm lo an nei haw thung a. An striker pahnih Romelu Lukaku leh Timo Werner te inhliam avanga thlak an ngai. Belgian striker, hmatawnga an innghahna hi Lasse Nielsen-a’n a foul a. Penalty chawi zuiin Lukaku nen an inchhilhnaah Blues forward hian a ke a ti na.
Werner-a’n halftime hma in hamstring hliam avangin a khel zawm thei lo bawk a. Mahse an tel lovin Chelsea an chak tho.
Inkhel tan tir atang chance tha nei nual Chelsea in minute 9-naah goal an khung a, Andreas Christensen chuan Thiago Silva pass mawi takin a hlap lut a. Lukaku penalty hmuh minute 21-naah Jorginho-a’n goal-ah a khung leh bawk.
Second half tir lamah substitute pahnih Callum Hudson-Odoi leh Kai Havertz te inkawpin goal thumna an thawkchhuak a, English winger in German forward Havertz-a goal tur a siamsak.
Minute 57-naah Eric Larsson-a’n Antonio Rudiger lakah penalty chawi lehin Jorginho bawkin an goal hnuhnung ber a khung.
Chelsea boss Thomas Tuchel chuan, “Point thum kan duh a, phu taka hmuh kan duh, zaninah kan duh ang tak kan hmu vek. Kan lawm.”
“Romelu khan a ke a bilh a, Timo erawh tihrawl hliam a ni thung a. A nat zawng endik ngai a ni chungin ni engemaw zat chu an chawlh a ngai dawn.”
“Player inhliam avangin kan squad hi kan buai lutuk ngai lova, tunah pawh Christian Pulisic chauh chhawr theih loh a awm, mahse player dam kim lo hi chu eng squad pawhin a tuar. Khelh tur a tam a, inelna hrang hrang a tam, chuvangin hliamin min tihbuai loh dan tur ber hi kan zawn a ngai a, chhuanlam a tling tur a ni lo.” tiin inkhel zawhah a sawi.
Russia-ah Juventus an chak hram
Juventus in chak turin huntawp dawnah Dejan Kulusevski goal khung an mamawh a. Zenit St Petersburg 1-0 in Group H inkhel pakhat zawkah an hneh.
Gazprom Arena-ah minute 86-naah Swedish forward hian penalty area chhungah vengtu nei lova awmin an chakna goal a tauh lut a. Goal hlauhawm tam lohna inkhelah Italian team a chakpui.
Massimiliano Allegri pawlte hi khelh thum atang vawi thum an chakna a ni a, group hmahruaitu an ni mek. “Point hmuh theih zawng zawng kan la hmu vek a, goal kan la chhuah miah loh bawk avangin kan tan he result hi result tha tak a ni. Mahse kan inkhel kha a tha tawk lova, ball inpek kual kan harsat zual hle.” inkhelh zawhah a ti.