Ultimate Fighting Championship chuan tun kartawp a UFC Fight Night main event tur Paulo Costa leh Marvin Vettori te intum tur chu catchweight-ah sawn an tum thu an sawi.
Nilaini zan khan Costa hian middleweight huanga inelna turah hian 185 pounds-ah a rihna a paih thei dawn lo tih a sawichhuak a. An inhmachhawn tur chungchanga fighter pahnihte an kawmnaah Costa leh Vettori te hian inhmachhawn tho an duh ve ve thu an sawi a, 195 pounds a intum an remti.
UFC chuan an intumna tur rihna bituk chin hi eng ang nge a nih dawn sawichiang lo mahse fighter pahnihten a thuphunga an sawi tawh angin middleweight leh light heavyweight rihna inkar 195 pounds ah a nih a rinawm.
13-1 MMA record nei Costa hian middleweight huang a theih dawn loh hnuah UFC in an rihna huang thlak chu an rawt ta zawk niin a sawi a. Nilaini khan pound 211 a rit a nih thu a la sawi.
UFC hian Costa hi middleweight a intum tura inremna awm tawh a tlin dawn loh avangin nidanga a tih thin angin pawisa a dawn tur atang a chawi tir dawn tho em tih erawh a la chiang lo.
Vettori chuan Costa chu eng rihna huangah pawh hmachhawn a inhuam thu a sawi a, chutihlaiin Costa hian chawpchilh taka hetia a tih a vang hian a thin a ti ur tih a zep lo.
“Fighter tha tak takte zingah a tel pha lo tih hei hian chiang takin a tilang. Class tak tak zingah tel se rihna paih tih velah hian a buai dawn lova, thil a nih dan tur ang takin a thlen tir mai ang. Amah vang hian thil a buai vek teuh hle.” tiin a sawi.