Beichhua’n Lungdar tlangdungah department hmunhmate enfiah


Animal Husbandry & Veterinary Minister Dr. K. Beichhua chuan nimin khan Lungdar tlangdung tlawhin department hmunhmate a enfiah nghal.
Dr. K. Beichhua chuan Biate khua tlawh hmasa berin, khawtlang hruaituten a hmuahna inkhawm an buatsaihah MNF sorkar chu a ram neitu an nih angin hun khirh leh harsaah Pathianin ro rel turin a ruat tih a sawi a. Khawchhak tlangdung chu a department enkawl kaihnawiha hnathawk nasa an nih thu leh chhunzawm zel tha a tih thu sawi.
Biate khuaah hian Dr. Beichhua hian AH&Vety department Dispensary leh Sericulture department hmunhma te a tlawh bakah Community Health Centre (CHC) a tlawh nghal bawk.
CHC-ah damlo an awm lo chu lawmawm a tih thu leh health-in a tum chu damlo enkawlna tha neih aiin dam lo awm loh a nih thu a sawi a. “CHC-a damlo awm lo chu Biate khua thianghlimna rah a ni,” a ti a, entawntlak a tih thu a sawi.
East Lungdar ah CDPO office a khawtlang hruaituten a hmuahna inkhawm an buatsaihah Dr. K. Beichhua hian, khawchhak tlangdung chu Mizoramah a thawkrim ber leh taima ber an ni tiin a department enkawl Vety leh Sericulture te nen phei chuan inngheng reng an nih thu leh thawhhona tha nei chho zel tura a duhthu a sawi bawk.
North Vanlaiphai Tourist Lodge-a khawtlang hruaitute nen an inkawmhonaah thu sawiin, Dr. K. Beichhua chuan, khawvelin hrileng avangin hun khirh tak a tawng mek a, hrileng avangin mimal, chhungkua, khawtlang, sorkar leh rampum a buai a, heng karah hian beidawng mai lovin hrileng boruak te a zia chho a nih chuan SEDP pawh chhunzawm leh ngei an tum thu a sawi.
AH&Vety leh Sericulture department atanga hmalaknaah Minister of State Dr. K. Beichhua chuan Biate, East Lungdar leh North Vanlaiphai tlangdung khua te chu ran vulh leh pangang khawiah te an hmalakna nasa tur a nih thu sawiin, hrileng a kian huna hmalakna a kal chhoh theih hunah sorkarin a hriat reng tur thu a sawi bawk.
North Vanlaiphai hian Vety Minister Dr. Beichhua chuan AH&Veterinary Dispensary a tlawh nghal a ni.

Leave a Reply

Your email address will not be published. Required fields are marked *

error: Content is protected !!