Damdawi lama thawk mi 180,000-in Covid-19 thihpui : WHO


World Health Organisation (WHO) chuan Covid-19 avangin khawvel pumah damdawi lama thawk mi 80,000 atanga 1,80,000 vel an thi niin an sawi a. Hei bakah hian hripui a len tawh loh hnuah pawh thawktute zingah rilru lama nghawng tam tak a nei dawn niin an sawi.
“Heng thihnate hi a lungchhiatthlak tak zet a ni,” tiin WHO hian Ningania thuchhuah an siamah an tar lang a. An chhinchhiah dan an tihchhuah hi January, 2020 leh May, 2021 inkara mi niin hetih chhung hian hripui avang hian mi maktaduai 3.45 chuang an thi.
Khawvel pumah damdawi lama thawk hi mi maktaduai 135 chuang awm anga chhut a ni.
Clinic leh damdawi ina thawkte hi kum 2019 tawp lama Chinese khawpui pakhat, Wuhan atanga COVID-19 a darh atang khan a bei lettu zingah a hmatawngah an tang nghal.
Invenna pek tan a nih khan ram tam tak chuan damdawi lama thawkte pek hmasakah an tantir a; mahse, khawvel pum dinhmun thlir erawh chuan an dawng tam lo hle a. WHO chuan damdawi lama thawk panga zela pahnih chauhvin invenna bikim an la la niin an sawi.
WHO Health Workforce Department Director Jim Campbell-a chuan damdawi lama thawkte hi invenna pek lamah ngaih pawimawha him taka hna an thawh theihna tur ruahmansak an tul hle tih a sawi.
September, 2021-a WHO-in ram 119 atanga report a dawn bihchian chuan ram hrang hrangin damdawi lama thawkte hnenah invenna an pek dan a inang lo hle.
African leh Western Pacific huam chhungah chuan thawktu 10 zela pakhat pawhin vaccine hi a bikimin an la la phak lo.
Ram hausa zual 22-ah erawh thawktu 80 chuangin invenna bikimin an la tawh tih hmuh theih a ni a. Ram hausa tlema zawng erawh chuan an dinhmun hi WHO-ah an thehlut ve hlawm lo.

Leave a Reply

Your email address will not be published. Required fields are marked *

error: Content is protected !!