Haiti-ah kumin chhungin mi 800 dawn ru bo tawh


Haiti ramah kumin chhung ringawtin mi 800 dawn ruk bo an ni tawh niin an rama pawl pakhat chuan an sawi a. Politics-a ngheh lohna lian tak awm mekna ramah hian mi sual rual (gang)-in thuneihna an chang zau zel.
Center for Analysis & Research in Human Rights (CARDH) chuan tun thla chanve kal ta chhung ringawt pawh khan mi 119 ruk bo an ni thu a sawi.
Mihring tawh phawt, tual chhung mi leh ram dang mi pawh ni sela, ru botute hian tute pawh an ru hreh lo.
Tun hnaia inruk bona langsar ber chu United States leh Canada atanga missionary-a kal mi 17 ruk bote kha niin kar kalta tawpah khan ruk bo an ni.
Venhimna lama derthawng tak ram ni sa, Haiti-ah hian July thlaa President Jovenel Moïse-a thah a nih hnu khan himna a awm lo lehzual a. Police tha a chak loh mek laiin gang-te chuan an ram zauh tumin nasa takin hma an la ve mek.
CARDH director Gedeon Jean chuan, “Mipuite hian Haitian national police hi an ring lo va, hei hi himna a chhiat phahna a ni a, police tha tawk kan neih loh bakah mipuiin an thlawp miau loh chuan that ngaihna pawh a awm lo,” tiin AFP news agency a hrilh.
“Kan chhinchhiah dan chuan gang lian zingah hian police pahnih zel tel ang an ni a, thenkhat chu gang-ah hian an inhmang thuk em em a, thenkhat erawh langsar lem lova anmahni humtute an ni a. An chet vel an phalsak a, thu pawimawh pawh tam tak an pe chhawng thin,” a ti.
CARDH hian October 16 thleng khan mi 782 vel ruk bo an nih tawh thu leh nikum chhung khan mi 796 ruk bo an nih thu a sawi a. A tak taka ruk bo phei chu hei aia a tam an ring a, a ru botuten phuba an lak leh an hlauh avangin tam tak chuan an sawi lo thin niin a sawi.
Haiti hian tun hnaiah khuarel chhiatna lian tak an tuar a, an ei bar dinhmun a tichhe hle a, hei hian tharum thawhna thleng a titam a. Haitian tam tak hian ei tur an neih theihna tur a nih chuan tih hreh an nei tam lo.
Inrinni khan Ohio-a hmunpui nei, Christian Aid Ministries-a thawk missionary-te chu Port-au-Prince khawchhak hret, Ganthier khuaa hnuchham in an tlawh haw bus-a an chuang chu 400 Mazowo gang-in an ru bo.
Ganthier hi Croix-des-Bouquets huam chhunga awm niin hei hi an pawl hian an thunun a ni a. An ruk bote tlan chhuah nan pakhat zelah $ maktaduai 1 an phut.
Ruk bo zinga pakhat hi Canadian niin mi dangte hi US mite vak an ni a. Mipa panga, hmeichhia pasarih leh naupang panga an ni a, a naupang ber hi kum hnih mi chauh a la ni nghe nghe.
Missionary-te rutu, 400 Mazowo hian lirthei chhuhsak leh tlanna sum an dilte hi an pawl intunnun nan an hmang thin.
April thla pawh khan he pawl tho hian Catholic rawngbawltu rual an lo ru bo tawh bawk a, a hnuah an chhuah a, tlanna sum an phut pek an ni em tih erawh hriat a ni lo.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427