Bayern Munich top scorer Robert Lewandowski chuan a hna pui ber chawl lovin a thawk zel a, Hoffenheim 4-0 a an hneh zanah goal khungin German champion in hma an hruai chhunzawm.
Allianz Arena-ah coach Julian Nagelsmann-a’n Covid 19 a kai avangin Bayern in coach tel lovin inkhel an hmachhawn a. Serge Gnabry chuan goal pawmsak loh a nei chungin minute 16-naah goal hmahruai a khung a. Minute 30-naah Lewandowski chuan khung belhin tun season-ah a league goal 10-na a ni a. Kum 2021chhungin league match 34 atangin goal 26 a khung tawh.
Second half tawp dawn lamah substitute Eric Maxim Choupo-Moting leh Kingsley Coman ten goal an khung belh bawk.
Borussia Dortmund in an goal thun khawl Erling Haaland inhliam avangin chhawr lo mahse 3-1 in Arminia Bielefeld an hneh a. First half-ah Emre Can leh Mats Hummels ten goal an khung hnuah England midfielder naupang tak Jude Bellingham chuan goal ropui a khung a. Penalty area chhungah Bielefeld player pathum bumin goal mawi a ‘chip’ lut.