EDITORIAL 25/10/21


Sorkar damdawi in hi pan nuamin i siam lehzual ang u!

Kan health infrastucture a changtlung chho viau a, state dangte nena khaikhinin thenkhatah phei chuan kan zahpuiawm bik tawh lo hle. He lam kawnga hmalatute hmalakna hi fak loh rual a ni lo.
Khawvel ram dangte pawhin hriselna kaihhnawih thil reng reng hi an ngai pawimawh a, thih leh dam inkar, mihring nun kaihruai thei a nih miau avangin ram hrisel tehna kawnga pawimawh tak pawh a ni tel bawk thin.
Kan ramah pawh kan phak ang tawka sorkar kan hrawn apiangte an chet ve zel avangin hmasawnna hmel kan hmu ve nual ta a, a mipui leh thawktu lam hi kan pawimawh chho ve ta hle mai thung.
Sorkar in theihtawp chhuaha hma a lak chhoh lai hian private hospital a lo pung chho ve zel a, inelna thianghlim neiin, damlo mamawhtute tan theihtawpin hma an la chho ve zel bawk. Hetih lai hian kan hriatreng atana tha erawh chu, heng private hospital pantu tam takte hi an neih bik vang a ni lo a, sorkar damdawi in tam tak pan an hreh vang zawk a ni!
Hmanraw tha awmna leh changtlung zawkte chu kan nei nameuh mai. Mahse, hmun tam zawk erawh hi chu a thawktute vanga pan loh phah a ni fo ta thung. Aizawl khawpui chhung ngeiah pawh sorkar enkawl damdawi in kan nei nual a, thawktu senior tawh tak tak leh thiam tak tak an awm chung hian, damlo tam zawkte leh awmpuite tan erawha thu hriatnuam pai lo an la awm fo thin hi chu sim a tan a tha tawh hle. Thenkhat chuan hotu sang lam thleng pha chiah tawh si lo a, an duty na hmuna ei neih ve ran dan an ngaihtuah an ti thin!
Damlo tana thlamuanpui tham tura duty te ngaih an nih laia thu hriat nuam lo chhak chhuak tlat zawk an la awmte hi enfiah lehzual a ngai tawh hle. Sawi vek sen a ni lo, luhchilh a chiang hi a va tam em! Sorkar hian a enkawl hlawhfate dinhmun hi a kil ber thlengin vil uluk lehzual se la, thingtlang kilkhawr zawk atanga harsa taka pantute dinhmun hre chungin enfiah hna thawk zual mawlh teh se.

Leave a Reply

Your email address will not be published. Required fields are marked *

error: Content is protected !!