Europe khawmualpui khawchhak lama coronavirus kai chu mi maktaduai 20 an tling ta niin Reuters-in a chhinchhiahnaah tar lan a ni a. He lai ram biala awmte hi hripui a len hnua a nasat ber lai an tawng mek a, invenna la erawh an la tlem hle bawk.
Europe khawmualpuiah chuan helai biala mite hi vaccine la la tlem berna niin mi cheng zahve pawhin dose khat tal pawh an la la hlawm lo.
Helai ram biala awm zingah Hungary chu invenna pe tam ber tawh an ni a, anni pawh mipui 62% chauhvin dose khatna an la la a; Ukraine-ah phei chuan 19% chauhvin an la la niin Our World in Data chuan a tar lang.
Tun hnaiah ni khata hri kai hmuh chhuah an tam chak hle a, ni tin mi 83,700 vel kai ziah ang niin nikum November hnua a san lai ber niin Reuters-in a chhinchhiahna a\angin a lang.
Khawvela mihring zawng zawng zinga 4% emaw chauh chenna, Europe khawchhak lam ramte hian tun hnaia khawvel puma hri kai 20% vel zet an thawh thung.
Reuters-in a chhinchhiahnaah chuan tun hnaia khawvel puma thihna tamna ram panga zinga pathum chu Europe khawchhak lama Russia, Ukraine leh Romania an ni.
Europe-ah hian thlasik in\an dawnah inkhuahkhirhna thlahdula in chhunga pun khawm phal leh chu COVID-19 darh chhan ber niin World Health Organization-a emergency director Mike Ryan chuan Ningani khan a sawi.
Europe khawmualpui khawchhak lamah hian hri kai an pun mek laiin mipuite erawh chuan vaccine lak lam an ngaihsak lo hle.
Sofia, Bulgaria leh khawpui dang tam takin invenna la ngei chauh in chhunga vantlang punkhawmnaa tel phal an tih leh finfiahna lehkha neih ngai tura Ningania an kalpui tan chu duh lohna nasa taka lantir a ni.
European Commission-in ngaihdan a lakna, Eurobarometer-ah chuan European Union hnuaia khawchhak lam ramte chu an healthcare system ringtawk 3% chauh an awm a, EU pumah erawh 18% a ni thung.
Europe khawchhak lama hri kai hmuh chhuah thar zinga 40% chuang chu Russia-a mi niin minute nga dan zelah mi 120 kai hmuh ang a nih thu Reuters chuan a tar lang.
An damdawi inte pawh an indaih lo tana an buai mek niin Health Minister Mikhail Murashko chuan Nilaini khan a lo sawi tawh a. Zirtawpni khan thi tam ber ni niin ni li a zawnin thih tam ber ni an tawng tawh.
Hetih lai hian Russia-ah ngei pawh hian mipui zinga 36% chuang awrh chauhvin invenna an la la.
An khawpui, mihring tam berna, Moscow chu tun karah hian supermarket leh damdawi dawr tih loh chu khar vek a ni dawn.