Service tha lo vangin Thlawhtheihna company pakhat Rs 85.5 lakh chawitir a ni

Service tha lo vangin Thlawhtheihna company pakhat Rs 85.5 lakh chawitir a ni

• Lallunghnema, Charity Lodge

Consumer Huang min lo chhiar chhuah sak thintu zawng zawngte chibai tha ber ka buk a che u.
Ka thu leh hlate hi lo chhiar ziah thin turin ka ngen bawk che u a ni. Consumer khawvelah hian consumer te hi kan tam ber a. Mizoramah pawh hian kan tam ber a ni. Mitin deuh thawin nitinin thil kan lei thin a. Thil lei lote pawhin mi dang service(tha leh zung) kan hmang thin bawk a ni.Hetiang hian entirna sawi ila,a fiah thei em? Lali chuan an kawmthlanga dawr pakhat a mi dailuah a lei a, consumer a ni. Lala ve thung chuan taxi a hmang a, consumer a ni. Heng dailuah leitu leh taxi hmangtute hian sum an sen ve ve avangin consumer an ni a. Dikna chanvo an nei ve ve. Lali dailuah lei chu a thianghlim felfai tha tur a ni a. A buk a tling bawk tur a ni. Lala taxi hman chu service petu a ni a. Lala chuan taxi fare chu dik takin a pe tur a ni a. A chuang a liam a chawi tur a ni hek lo. Heng ka thu sawi innghahna chu Consumer Protection Act 2019-ah a awm a ni. Consumer Protection Act 2019 hi thil leitu leh hmangtute tana siam a ni a. An chakna leh inhumhimna tura Dan Rangkachak a ni. Mitin tana chanchin tha, thu hlu leh ropui a ni.He Dan bakah hian Legal Metrology Act,2009 a awm bawk. Dan tangkai tak tak eng emaw zat a la awm cheu, ka ti lo em ni?
Heti khawpa Dan tha hi ngai pawimawh a hmang tangkai tur chu kan va ni teh reng em! Kei phei chuan heng Dante hi ka chhuang a, Bible dawttuah ka ngai hial. Chuvangin thil tha duhtute chuan Consumer Protection Act-te,Legal Metrology Act -te hi zir rawh u,ka ti a ni;kan ngai pawimawh hle tur a ni a. Consumer Right hi kan hmang tangkai tur a ni. Sawi leh thin ila, corruption do nan leh ram economy dinhmun sang taka chawikan nan Consumer Right hi a pawimawh em em a ni. Consumer Right hi mitinin i uar ang u, changkanna dik a ni si a.
Kan thupuia kan luh hmain heng hi ka sawi duh. Ka article chhuak hnuhnung berah khan Consumer Commission- te thuneihna (jurisdiction) thenkhat leh consumer-ten complaint an thehluhnaa an fee pek tur zat tarlan a ni a. Cheng nuai 5 chin hnuai lam tan pawisa pek a ngai lova, pawisa chawi miah lovin complaint thehluh theih mai a ni. Heng a fee pekte hi Welfare Fund-a lut tur tih a ni a, lo hman then a rem lo a ni ber. Consumer Commission-te hi Consumer Court-tia sawi a ni thin a. Ramhuai hnawhchhuah nan a tha em em a ni. Kei pawh hian tun thleng hian he Consumer Court-a ka lo awm ve tawhna changchawi hian ramhuai (Dawrkai chapo ho leh sumdawng pamhamho)ka hnawtchhuak thin a ni. Chutih laiin Consumer Commission-te hi an chak a ngai hle a. Consumer-te beisei ang ngeia thawk turin mipuiin kan beisei a ni. Sawrkar pawh hian ‘a thling’ an ni tih hriain Consumer Commissionate-te chu an vil ngun tur a ni. Engkim bul leh tawp an nih hi hriat fo a tul a ni.
Ka message dawn zinga pakhat hi ka han hrilh lawk teh ang.che u. “Zote pa K.Lalruatkima’n Thenzawla Pu Lalsangzuala hnen atanga mobile phone a lei chungchang chu District Commission chuan a ngaihtuah nawn leh a, tun thlenga a thlakna an la chah thlen theih loh avangin a phone man pangngai pe let leh turin tih a ni.” tih hi.
District Commission tih hi Serchhip District Commission a ni a. Engpawh nise, heta ka tarlan tum tak hi chu Consumer Commission-te hi i hmang tangkai ang u, tih hi a ni. Zote pa pawh hi mi vengva leh huaisen a ni tih ka sawi duh bawk. He pa huaisen hi hmuh ka chak hle a ni, ka rilru ang pu mi a nih hi, ka ti thin. Tichuan, eng thil pawh lei ila, kan thil leiah kan chiang tur a ni. Bungraw tha, tlo leh hman tlak lei tum tur a ni. Kan thil leite chu a tha lo a nih chuan kan thleng leh ang . Warranty period huamchhung erawh a nih a ngai. Dawrkai thenkhat, mahni hmasialten an cash memo-a ‘thil lei tawh thleng leh theih loh’ an tih hi an duhthusam mai a ni. Mahni hmasialna thil vek a ni. Warranty period a nih chuan a thlawn a siam emaw, bungraw thleng emaw, pawisa pek kir te hi Dawrkai leh sumdawng ho mawhphurhna a ni. Cash memo-ah chiang takin hetiang thilte hi ziah lan thin tur a ni.
Kan thupui kan kheh tan tawh ang. Hmanni lawk khan UP State Consumer Disputes Redressal Commission member zahawm tak Rajendra Singh chuan thupek tichhuakin Flight Operator Indigo chu Cheng nuai 35 compensation leh Cheng nuai 50, complainant rilru tih nat man(mental charge) leh complaint buaipuinaa senso Cheng singnga chawi turin judgement a siam a . Hei hi complainant Vinaj Shankar hnena pek tur a ni. A vaia Indigo Company chawi tur hi Rs.85.5 lakhs zet zawt a ni.A rurh khawp mai!
HETIANG HI THIL THLEN DAN CHU A NI:
V.S. Tiwari hian April Ni 15 Kum 2013 Khan cleartrip kaltlangin Lucknow-Delhi air ticket a booked ve a. He Vai tlangvalfel fak hian ohur takin Amousi Airport chu a pan ta vang vang a.Ngaih tha takin Tiwari chuan a thlawh hun a lo thlen dawn hnaih chuan a seat 5A-ah chuan a thu ve ta ran mai a. Mahse, a rin loh takin a thlawhtheihna ticket chu cancelled -sak a nih thu hrilh a ni a, Chutih rual chuan flight chu chhuahsan tur a tih a ni zui leh nghal bawk a. A hrilhhai thlak duh ngawt ang le. Tiwari chuan Cleartrip chu thil awmzia a va zawt leh ngat a. Ticket pe chhuaktu Cleartrip chuan a ticket chu cancelled sak a nih loh thu an lo hrilh bawk si a. Tiwari chu a thinrim hle a ni. Tiwari chu Indigo lakah chuan a lawm lo hle a. Hetiang mai mai a, khualzinte an lo tihdan hi hrem phuin a hria a; nasa takin a tuar bawk a ni. Tichuan he Thlawhtheihna Company Indigo hi Consumer Commission hnenah a khing ta a ni.
State Commission hian Indigo hi Consumer Protection Act 2019 bawhchhia a deficiency in service tia puhin hetiang hian hremna a lo ti chhuak ve leh ta a ni. He thutlukna hi inhremna sang ber pawl India ramah hian a ni awm e. Kan sawi thin tawh angin Air Company te hi service provider an ni a. Thlawhtheihna passenger te chu an consumer-te an ni. Passenger-te hian dikna leh chanvo tha tak an nei a. Consumer dik tak an nih avangin an himna tur an ngaihtuah ber tur a ni. Service tha an pek chuan, consumer-te tan a tha a, anmahni tan pawh hlawkna,(gain) a tling bawk. Customer-te satisfaction chu an goal a ni tur a ni.
Mizoramah hian thlawhna tumhmun (Airport) pangngai tak pakhat kan nei ve a. Nitin thlawhtheihna engemw zat a thlawk lutin a thlawk chhuak a ni. Mizoram tan a tangkai hle. Consumer-te hi thlawhtheihna pawisa senga bmang tute kan ni a. Consunerte hi Kan pawimawh ber a ni.Inringtawn leh inmamawh tawn theuh kan ni. A tute mah hi induh tawk thei kan ni hek lo. Chuvangin consumer-te himna turte, consumer-te lawmna turte ngaihtuah chu service provider-te mawhphurhna a ni. An lalte an phur tih hi hre reng se, a him ber ang tih hi ka sawi duh a ni. Customer-te laka rinawm lohte,hawihhawm lohte hi Dan bawhchhiatna a ni hrim hrim a,an lungawlohna sawi chhuak ngam hi mi puitling zia a ni bawk.Mizoramah hian smart consumer nih a har love, ram dangin an tih theih chu kan ti thei ve ngei tur a ni.