UFC middleweight title chuh tawh fighter pahnihten Inrinni zanah Octagon an lut a, an intum turin boruak a neih len chu cage chhunga chingfelin unanimous decision in Vettori a chak.
An inlan hnuhnun ber a champion lai Israel Adesanya hneh lo ve ve tu fighter te hi middleweight a intum tur an ni a, mahse Costa hian a rihna a paih theih loh avangin catchweight-ah an intum a ngai a. 185 atang 195 pounds-ah sawnin hei pawh hi a la tlin lova, lightheavyweight-ah an intum tur.
Costa hian a tlin loh avangin a sum dawn tur atang 20% hi Vettori hnenah a kal phah a. Rihna paih lovin Costa hian inlan a duh a, Vettori a tlanchhe bik lo.
Costa chetdan avangin mixed martial arts khawvelah fighter leh midang tam takin Brazilian fighter an dem hle.
Las Vegas a intumah fighter pahnihte inkarah ding chunga kut inthlak a tam a, Costa-a’n a rihna paih loh avangin na taka kutthlak a tum a, Vettori-a’n che rang zawk a ni dawn a, a khingpui chu a hah hma dawn tih hria in fing takin Costa a hnek fuh thin.
Judge pathumten 48-46 vekin Vettori hi chakah an puang a. “Kei aia tumruh leh tuarchhel hi an awm dawn lo. Round 4 leh 5 a nih tawh chuan tumah kei anga tlo tur an awm lo tih ka hria. Mi tam takin a reiah a tha dawn lo niin an ngai a, mahse a rei atan a inbuatsaih tha tih a hriat. A awlsam bik lo.” tiin a sawi.