I pasal chian loh vang a ni thei em?

HMEICHHE HUANG:
I pasal chian loh vang a ni thei em?

Zirchianna atanga a lan danin, nupa-a chian lohnaah hian mipate hian 40% zetin mawh an phur tih a ni a. Mipa chian leh chian lohna hi chi (sperm) enfiahna atanga hriattheih a ni.

A tlangpuiin chi a tlem a, a quality pawh a hniam viau anih chuan mihring siamna kawng a harsa nghal mai thin.

Amaherawhchu, chi nei tlem ve tak takte pawh hian naupai tir theihna an nei ve thei thova, chhul atanga chi a lo chhuah hun-a tui (egg) va tihlim thei tur ang zat a awm phawt chuan a hlawhtling tlangpui a tihtheih.

CHI (SPERM) TLEMNA CHHAN?
Mipa chi a tlem tih sawi chianna atan ‘Oligospermia’ tih tawngkam hi hman thin a ni a. Kha ‘Baw’ -ah khan chi a awm lo anih chuan ‘Azoospermia’ an ti bawk.

Hetiang thilah hi chuan doctor te’n a mipa zawk hi uluk taka enfiahin, hun kaltawhte pawh an thlir sak thin.

Tun hma-in tilmu (testicles) ah harsatna i nei tawh em, Naupan laiin serh-ah sawiselna a awm em tihte leh kap bawr velah zai i tawk tawh em? tihte hi a tlangpuia an zawh thin a ni.

A theih hram chuan specialist rawn a tha hle a, ani hian serh leh a bul vela hliam leh natna inkaichhawn theih ang chi a awm nge awm lo tih an enfiah dawn a ni.
Natna inkaichhawn theih ang chi a awm chuan mihring siam hi thil harsa tak a ni a, nun uluk a ngai a, thianghlimna leh faina kawngah pawh taimak a ngai hle bawk.

CHHAN DANGTE AWM THEI THO EM?
Boruak lum (heat) hian chi a tichhe thei tlat mai a, chuvangte pawh ani mahna- tilmu hi chhung lama awm lova, pawn lama Khuanui’n a lo dah ni? A mak tih loh rual a ni lo.

A bik takin, mipa thau tak takte hian he harsatna hi an tawk nasa bik hle a, dul vela thau inhlawmkhawm hian tilmu lamah boruak lum nasa tak a pump luh thin vang a ni.

Rei tak tak thutna ang chi te, rei tak tak motor khalh thin te tan paw’n fimkhur a ngai lehzual. Tin, uchuak taka sex hman pawh hi a tha lova, nikhatah zial tlawn 20 chuang zu te tan hlei hlei hlauhawm tak a ni.

Zu in pawh a haw hle mai a, chi a titlem nghal rawih rawih bakah mipa hormone testosterone pawh a tihnual nghal thei bawk.

Nilenga hah taka hnathawkte tan pawh fimkhur a ngai hle ang.

ENFIAH LAIA HARSATNA AWM THEI TE?
Mipa chiang lo nia hriatte hi uluk taka exam an ngai a. Chutih laiin, serh pawn lam atang mai chuan thil chiang lo hriat chhuah hi a har hle. Mahse, tilmu pahnihte inlen hleih hi a awm thin a, tilmu awm lo te nen a awm thei.

Chi chhuahna dawhthleng an tih mai ‘vas deference’ pawh awm lo thei tho a ni a, hei hi tilmu atanga chi lo dawngsawng tu niin, heta tang hian inpawllai hian hmeichhe serhah mipa chi hi a supply thin.

Leave a Reply

Your email address will not be published. Required fields are marked *

error: Content is protected !!