Inkap fuh palh ni em… tunge a kaikuang?

New Mexico-a silai hmehpuahna vanga thihna thleng leh hliam tuar te hial an awm hnu-ah Ho-llywood film, Rust siamna hmuna silai hman chungchangah inhnialna leh thu inchuhna a nasa nghal hle.
Actor Alec Baldwin silai mu tuarin kum 42 mi cinematograpber Ms Hutchins a thi a, Film director Joel Souza (48) pawhin hliam a tuar.
He thil thleng hi police te’n uluk takin an chhui mek a, prop gun-ah hian tu in nge live round (silaimu tak) dah ang le, tih chu inhnial theih tak niin, Baldwin hian live round a awm leh awm loh engmah a hriat loh thu a sawi thung.

Engvanga film shooting neihna hmuna silaimu tak an hman?
Mithiamte sawi danin, film siamna hmun-ah hian fimkhur theih tawpin eng-kim kalpui thin a ni a, silaimu tak hman a ni ngai lo. Engvanga silaimu tak lo awm ve ngawt nge a nihna chhan hi chhui mek a la ni. Thuchiang a awm mai thei lo.
Baldwind-a hian silaimu awm lovah ngaiin a kap mai, niin a sawi a. Heti anga silaimu tak awmna, a kuta pek a ni ta hi thil mak tak a ni bawk.
First assistant director Dave Halls-a’n he silai (Colt revolver) hi a chhunga silaimu tak a awm tih hre lovin a la chhuak ve mai a, Baldwin kuta a pek lai hian, ‘Cold gun’ tiin a auchhuak nghe nghe. Chumi awmzia chu, silai hi a him tâwk a, film an siamnaah hman theih a ni, tihna a ni.
Old West-style Church chhunga film channaah camera lam hawiin Baldwin hian silai a hmetpuak ta a, chu chuan video lo latu Hutchins chu a deng fuh chat mai a, rang takin Helicopter-in Damdawi In panpui ni mah se, chhan hman a ni tawh lo. Souza pawh ambulance-in Damdawi In panpui a nih hnu-ah pawikhawina thlen hun Ningani tlai vek khan chhuahtir a ni.

Silaimu tak hi a hman ngawt theih reng em ni?
Sawi tawh angin, film sets-ah hian silaimu tak hman a ni ngai lova, Baldwin-a silaimu kahchhuah tuara thihna thleng pawh hi thil mak tawpkhawk nia ngai an tam. Thil thleng zen zen a ni si lova.
Kum 30 chuangzet silai leh a behbawm dangte supply thintu Mike Tristan (60) chuan Ms Hutchins-i chunga thil thleng hi hriatthiam a har hle, a ti.
Baldwin nen pawha lo thawk dun tawh an ni a, profession amorer (silai endiktu) hian midang kuta silai a hlan hmâ in, uluk leh fimkhur takin a endik hmasa ngei ngei tur a ni, a ti.
“Silai hi a ruak tur a ni a, midang kuta hlan hmâa silai enfiah hi armorer mawhphurhna liau liau a ni. Tichuan, actor awmdan tur leh din tan tur te pawh ruat fel thlap tur a ni a, a tin (focus) te thlengin an hrilh hre chiang tur a ni bawk. Editing neih leh hunah a chanpuitue a tin ang khan an siamrem thin, ” tiin Tristan hian a sawi.

Leave a Reply

Your email address will not be published. Required fields are marked *

error: Content is protected !!