Jammu & Kashmir-a Shopian district-ah, Pathianni chawhma khan civil mi pakhat thah leh a ni a, a thih danah hian sawi dan hrang a awm nual a. Venhim hna thawktuten an kah hlum ngei nia hriat a ni a, tihpalh nge tum reng erawh hriat a ni lo.
Zainpora khuaa kah hlum hi kawngkama apple zuartu nia sawi a ni a, police leh venhim hna thawktute sawi dan inhmu chiah lo a awm a, sipai camp bul lawka kah hlum a ni.
Shahid Ajaz-a ruang hi a thil zawrhna tawlai nghengin a awm a, hei hi mi tam takin thla an la.
Police chuan kum 20 bawr vela upa, Ajaz-a hi mi dang nena inkahnaa silaimu tawng palh niin an sawi a, chiang zawka an chhui nghal thu an sawi.
“Chawhma dar 10:30 vel khan mi firfiakten Babapora, Shopian-a 178 Bn, CRPF Naka party chu an bei a. CRPF hian kap letin inkah tawnnaah tunge a nih hriat loh kah hlum a ni a. Thil thleng kimchang engmah hriat a la ni lo,” tiin Shopian district police chuan Twitter-ah an tar lang.
Central Reserve Police Force (CRPF) chuan ralthuam a keng nia an hriat avanga an kap nia sawi a awm bawk a. Mi dang \henkhat chuan mi rinhlelhawm an kap niin an sawi bawk.
Tual chhung mite erawh chuan apple zuartu leh CRPF pakhat chu an camp-ah an inhnial buai a, sipai hian a kap ta niin an sawi ve bawk.
Union Home Minister Amit Shah chuan ni thum châmin Jammu & Kashmir hi a tlawh mek a. Inrinnia venhimna lam thila inkawmna an neiah hotu lawkte chu tun hnaia firfiakte chetna tam chu hmet mit tura che na sauh turin a ti nia sawi a ni.
Home minister hian vantlang hmaah chuan kum hnih liam taa danpuia Article 370 hmanga Kashmir hung bikna hlih a nih hnua an chanchin chu firfiaka chetna leh lunga intawngna a\angin hmasawnna chanchin a thlak ta tih a sawi.
Pathiannia thil thleng hi tun thlaa South Kashmir-a venhim hna thawktuten civil mi an thah pahnihna a ni ta.
Chawlhkar hnih liam ta khan Parvez Ahmad-a chu Anantnag-a lirtheia a chuang chu CRPF-in an lo kap hlum tawh bawk a. Police-in an sawi dan chuan sipaite hian anmahni inven nan an kap a ni.
Kashmir-ah hian tun hnaiah civil mite thahna a tam hle a, a tam zawk hi chu mi firfiakten an thah a ni a. Tun thla chhung ringawtin civil mi 11 thah an ni tawh.
Thah zingah hian state dang atanga Kashmir-a luta hnathawka awmte pawh an tel nual a. Hei hi hlauvin mi tam tak chu anmahni state lamah an inphurh haw phah.