Premier League hmahruaitu nihna hauh lailawktu Chelsea in table mawng a awm Norwich City lakah goal sarih an khung a. Stamford Bridge-ah chungnung takin 7-0 in hnehna an chang.
Inrinni zana Premier League inkhelah Thomas Tuchel-a pawlte hian a tir minute 18 chhungin goal hnih an khung nghal thuai a. Hattrick siam Mason Mount a langsar zual.
Tun season-a a goal hmasa ber minute 8-naah a khung a. Callum Hudson-Odoi pawhin goal khung belh ve nghal thuaiin halftime dawnah Mount-a’n Reece James oal khung tur a siamsak ve leh.
Second half-ah left-back Ben Chilwell chuan a zawna match li na atan goal khung lehin Blues hmahruaina a sang zel a, Max Aarons-a’n own goal nei bawkin inkhel a zawh hma in Mount-a’n goal hnih a la khung.
Canaries defender Ben Gibson chu second half-ah yellow card a hmuh nawn avangin hnawhchhuah a ni a, mikhual team tan tlem zawk nih hnuah a harsa zual a. Tun season-ah khelh 9 atangin hnehna an la chang lo.
Blues tan a awlsam
Chelsea in striker rinrawl Romelu Lukaku leh Timo Werner te inhliam avangin a chhawr thei lova, coach Tuchel-a’n Kai Havertz chu hmatawngah a dah a, Mount leh Hudon-Odoi ten an thlawp. An tlarhma insiksawi vangin Blues hmatawngah tharum aiin player fing intlan thelh hmuh tur a tam a, Canaries defence in hei ber hi an veng thei lo.
Mikhual lamin Blues player-te an bawr buai nasa lova, tunlai football a an uar em em ‘high press’ an khelh loh avangin Blues player-ten duhtawkin ball inpek kualna hun an nei a, hei hi Chelsea player thiam rual in remchangah an la.
Substitute Milot Rashica hmanga goal hlauhawm an neih bak Canaries in Chelsea goalkeeper Edouard Mendy hna an thawh tir meuh lo.
Manager kamchhuak
Chelsea manager Thomas Tuchel chuan goal sarih khung mahse an tan thil thlir thiam a pawimawh thu a sawi. “Match khat chauh a ni a, Thawhlehni zanah a dang kan nei lehnghal. Kan result avangin player-te fak tur an ni, chutihrualin match khat chauh a ni tih hriat a tha.”
“Kan kheltha a, kan hriam bakah kan thawkrim hle. Ball kan chhuhsak hnem a, chance tha pawh kan ngah, mahse goal sarih khung tur hi chuan vanneih leh thil a kaltluan ve te hi a ngai.” tiin an inkhel a thlirlet a.
Goal khungtu Mason Mount fakin, “Coach chu team result a that chuan kan lawm a, kan lung a awi thin. Mahse kan hmatawng a khel player te erawh goal an khung loh chuan an hlim tak tak thei lo. Ani pawhin goal khung a mamawh a, a nghak rei bawk a, hei vang hian hattrick a siam hi ka lawmpui.” tiin a sawi.