DAVIDA DAWHKAN
- Mahmuaka Chhakchhuak
Israel lal hmasa ber Lal Saula alo thih chuan Davida chu Israel lalah alo tang ta a, Davida a lal tan tirh hi BC. 1010 niin kum 40 chhung a lal a ni. Chutianga Israel hnam pumpui chunga lal alo niha rorelna a chan takah chuan Lal Saula chhungte zinga dam la awmte an awm chuan tiin hmuh a duh thu a sawi a. Tichuan Saula chhungte chhiahhlawh pakhat Ziba chu ala dam thu an sawiin a ni chu Davida hnenah an rawn hruai ta a. Davida chuan Ziba hnenah chuan Saula chhungte zinga mi dam an la awm em tia a han zawh chuan Jonathana fapa pakhat dam ala awm thu leh a ke pawh a bai nghe nghe a ni tiin a han sawi a, Davida chuan amah chu zawng turin mi a tir nghal a, an va hmuin a hming chu Mephibosetha a ni a. Davida hnen an rawn hruai chuan alo khawngaih hle mai a, ’i pa Jonathana vangin ka khawngaih ang che a, i pu Saula ram zawng zawng ka neih tir leh ang che a, ka dawhkanah chaw i kil ve fo bawk ang’ a ti a.
He thawnthu hi a ngaihnawm hle mai a, a bik takin Lal Saula leh Davida inkar boruak hriatchian phei chuan a ngaihnawm lehzual. Saula chuan Davida kha vawi tam tak thah tumin a bei thin a, Davida chu a tlanchhe zelin beihlet ve theihna hun a neih pawhin kut thlak duh loin a tui um te a laksakin a chang phei chuan a puan femte a hlehsak bawk a. Tumkhat phei chu Davida chu Philistia khua Ziklag-ah kum khat leh thla li lai a bikbo nghe nghe kha. Heng zawng zawngah hian Davida chu Pathian mittlung takin a awm a, Saula lakah pawh hian rilru chhia engmah a pu lo a, Pathian hriakthih a nih avang chuan kut thlak a duh ngai lo a ni. Hetiang avang hian Davida chu malsawmin a awm a, Pathian malsawmna tam tak a dawngin Israel fate chungah pawh hmuingil takin rorelna a nei a ni.
Davida leh Saula chanchinah hian kan ram rawngbawltute tan hian entawn tur tam tak a awm a, ringtu kan nihna zawn atang pawha entawn tur ni mai lo a, kan tih ve ngei ngei tur zawk nia lang pawh a awm thei bawk awm e. Saula hian Davida hi naupangte a nih laiin a mil tawh lo a, feia khawh hlum alo tum tawh nghe nghe a nih kha. Philistia mi Goliatha pawhin Israel mite chu an rawn auin a rawn cho chiam tawh bawk a, chumi tumah chuan Saula chuan hlauin a biru a, Davida erawh chuan naupangte niin a cho thung a, virvawm hmangin Goliatha chu a ti hlum ta a ni. Hetia Goliatha a thah zawha alo haw hi hmeichhe ho chuan lo hmuakin ‘Saulan a sanga sang a that, Davidan a singa sing’ tia Davida lawmna a tana an lo au chuan Saula thin a ti ur ta tlat mai a, Davida chu a mil ta lo em em a ni. Suala hian thil tha titu lawmpui hi a harsat tlat mai hi amaha sual awm vang a ni. Hetiang chiah hian keini pawhin kan zinga thiltha titute hi kan lawmpui theih a pawimawh a, itsikna thinlung kan neih a tha lo a ni.
Saula hian a fapa Jonathana chu Davida that turin a hnuah a tir leh a, nimahsela Jonathana hian Davida chu a hmangaih tlat si avangin a nunna humhim thin a, Davida mangang chuan zawlnei Samuela hnenah a kal phah ngawt bawk a, Saula lahin Davida chauh pawh niloin Samuela pawh chu thah a tum phah hial a, nimahsela Pathianin a hum tlat thung a, Rama khuaah chuan thusawi dual dualnaah a tel ve phah hial a. Pathian mite meuh pawh zah loa thuneihna kan hman duh tawh chinah chuan kan chungah thilmak alo thleng fo thin a, Saula ngei pawh hi mi anglo ang maiin thu a sawi ve ta bual bual a nih kha. Ringtu kan nihna hi kan thiltihna hmun hrang hrangah hian kan lantir fo a pawimawh a, Pathian tihna tak tak nena ram rawngbawlna kan neih a pawimawh a ni.
Saula thinlungah ramhuai a luh tlat tawh avangin Davida chu thah tumin vawi tam tak a bei a, nimahsela Davida chu Pathianin a hum tlat thung a, Saula pawh thahna remchang tak awmin nei thin mahsela Davida pawh chuan a that duh chuang lo a, Pathian hriakthih a nihna chu a zah sak a ni. Keini chuan Pathian hriakthih pawh zah bik lemchuang hauh loin thuneihna kan hmang thin niin a hriat a, kan tawngkamah chiah Pathia rawngbawltute zahna kan ti lang niin a hriat. Hei hi a pawi hle a, engkim titheitu Pathian hi kan hriatchian loh vang a ni. Pharoa thinlung sak pawh tinem theitu a nihna hi ala pangngai reng tih kan hriat reng a tha.
Davida chuan Israel fate chunga roreltu alo nih chuan Saula chhungte zinga dam la awmchhun chu a zawng chhuakin Jonathana fapa Mephibosetha, a ke khinghniha bai chu lal chawei dawhkan chu tukzanin a kil tir ve hial a. A pu Saula chu amah thah tuma vawi tam tak a bihruksan pawh nisela Davida chuan an chhungkaw zinga dam awmchhun chu duat tak leh hmangaih takin a enkawlin lal Inah a chen tir bawk a, thinhrikna engmah awm loin lal chhungkaw ei leh in ang ang chu a ei tir ve hial a. Hetiang thinlung hi kan ram rawngbawltute hian nei thei vek sela he ram hi Pathianin mal a sawm lehzual ngei pawhin a rinawm. Kan hmaa roreltute sulhnu kan chhunzawm duh ngai lo a, kan fakin kan chawimawi duh ngai hek lo, midang chawimawina hi keimahni ropuina a ni tih hi kan hriat duh tlat thin loh avang hian tunhnaia kan ram rawngbawltu thenkhatte hi chuan anmahni leh anmahni inchawimawi an tum a, rei an daih thei ngai lo a nih hi.
Kristian ram kan inti a, keini aia Pathian biakna hun nei tam hi khawvelah an awm kher awm lo e. Chutiang taka ringtu tha kan intih lai chuan kan ram rorelna hmun sang ber atangin chunglam malsawm duh loh zawngin rorelna kan nei nge ni kan ram rorelna a kal fuh tak tak thei ngai lo a, UT kan nih tan, kum 1972 atanga keimahni bila ram roreltu kan neih tan atang tawh khan mipui kan la phun reng a nih hi. Pathian tihna tak tak nena ram rawng kan bawl a pawimawh a, chu chu mipuite tan pawh malsawmna a ni. Kan hmelmate pawh hmangaih thei turin roreltute hian thinlung an neih a ngai a, chutiang a nih loh chuan an rorelna a tluang ngai hauh lo ang. Saula leh Davida chanchinah hian zir tur tam tak kan nei a, Davida dawhkana hmelma chhungkaw zinga mi pawhin tlangnel taka chaw a kil thei ang hian kan rorelna hmun tinrengte pawh hi hmelmate tan pawha malsawm ram rim a nam theih ngeina turin thinlung tak taka Pathian tihna thinlung nei chunga ram rawngbawlna kan neih a pawimawh hle a ni.