Consumer Court-in coaching institute a hrem
- Lallunghnema, Charity Lodge
Chhiartute chibai ule,
Tun chawlhkar kan hman mekah hian hun tha, ni tha tak hmang theuh turin duhsakna sang ber ka hlan a che u. Keiniho hian consumer khawvela thil leitu leh hmangtute harsatna te chinfel thuai a nih theih nan hma kan la ve zel a. A sawt chang a awm a, a sawt lem loh chang a awm thin. Mahse a khaikhawmna atan chuan kan beihnate hian rah tha a chhuah ve det thin tih hi a ni.
Kan thianpa Rohnuna nen hian nikum tawp lam atang khan thlawhtheihna ticket refund kan buaipui a; engemaw zat kan hlawhtlinpui a, chutih laiin a nawlpuiin harsatna lian tak an la neih avangin chawlhkar kal ta khan Civil Aviation hotupa Pu Hminga leh Pu Sangpuia, Dy.Controller te thahnemngaihnain Air company pakhat Delhi-a mite chu ko chhovin heng air ticket refund chungchang hi kan sawihova. Air company te pawhin an policy zulzuia thlawhtheihna ticket refund vek an tum thu an sawiin ziakin an intiam nghe nghe a ni. Rei vak lo hnuah chinfel theih a beiseiawm hle. He meetingah hian min sawm angin ka tel ve a. Thil tam tak kan sawi a, kei chuan Dan bawhchhiaa ticket refund tih loh hi Consumerte lak a ‘exploitation’ a ni ka ti a. Consumer Court a kan khin che u chuan Cheng tam tak in chawi ngei ang. Boruak chhe tak a awm hmain hma in lak a tha ang tiin ka han vau khan ve a. Beiseina sang tak neiin kan in then fel thei ta chu a ni a. Kan lo ngaichang dawn a ni.
Hetih laia ka sawi duh chu online a thil chah emaw air ticket booking kan uar lutuk hi a pawi thei tih hi a ni. Mi tam tak, intihhmuhin online- in thil kan chah teuh teuh a, bungraw hman tlak lo leh chhe tak tak kan chah thin a. Mi tam takin complaint ngam leh si lovin an phum liam mai mai a. Chu a chhapah mi tam tak awmna a kilkhawr deuh avangin an door step-ah an deliver sak duh lova, chhuanlam fahrah te te siamin an duh chin chauh thlengin customer te chu bungrua an pe ta thin a ni. Bungrua engpawh on-line- a chah(direct-selling tih a ni bawk) hi home delivery tur a ni hrim hrim. Kum engemaw zat liam taah pawh khan on-line- a bungraw chahtu police officer chu, an in panna kawng a kual deuh avangin chhuanlam siamin home delivery an tihsak theih loh thu an hrilh a. Police Officer chu a thinrim hle mai a. He thil hi min rawn hrilh chuan kei chuan “online-(direct selling) hian home delivery a keng tel a; an tihsak theih dawn loh che chuan Consumer Protection kalh a ni e, ‘ka khing dawn che u,’ tiin vau rawh ka ti a. Chutianga ka thu rawn ang a a tih hnu chuan home delivery an tihsak ta chauh a ni.
Direct-selling delivery boy te hian an bungraw phurh bawr leih luih leh kawng chhia leh kawng kual chhuanlama hmangin on-line- a bungraw chahtute in thlensak loh an nei fo thin a. Bungraw chahtute lah chuan an at vang nge, an fin vang phei chu ka hre law, delivery boy te duh dan danin an awm a. Home delivery an pumpelh chawk thin. Hei hi tih dan tur a ni love, delivery boy chuan motor thlen theih lohna pawh ni se, a leitute kawtkai thlen turin phurh pawh a phur ve mai tur a ni.
Chutiangin gas-te pawh hi home delivery tur a ni hmiah mai a. Sawrkar pawh hian chak takin hma la tawh rawh se. Tun thlenga home delivery a la ni lo fo hi chu mualpho thlak a tling. Mipui hian duh loh tur pawh a ni lo. Chak et et zawk tur kan ni. He thil hi ka sawi zing lutuk tawh. Home delivery a nih hna chuan kan sawi zel ang.
Sawi thin tawh angin tunah hian College Veng chuan Home Delivery vekin gas an la tawh an inchhir lo. “Gas a lo thleng dawn!” tih an puang ngai tawh lo. Nangni Aizawl Veng dang mipuite u, gas home delivery hi lo thlahlel lul teh u. In inchhir lovang e.
Kan thupuiah inkhalh lut leh tawh ang aw! Tichuan, heti hi a ni a, Chandigarh khawpui thianghlim leh fai tak, mumal taka insakna hmuna District Consumer Commission chuan Coaching Institute neitu pakhat chu an zirlai pakhat hnena Rs. 69,909/- pe kir turin a ti a. Saptawngin hetiang hian ziak a ni, ‘DCDRC, Chandigarh had directed FIITJEE Ltd. to refund Rs.69,909 fee to a Panchkula resident, citing refusal to refund coaching fee midcourse as gross trade practices,'(Mrs. Nisha Agarwal vs FIIJEE limited)
Pu Rajan Dewan-a kaihhruai Chandigarh District Commission chuan he Institute hi complainant hnena rilru hliamsak man atan Rs.25000/- pe tur leh Commission-a complaint theuhluhna senso atan Rs.7000/- pe turin a hrem ta a ni. Complaint a thlennaa a sawi danin Nisha Agarwal chuan Cheng nuai khat singkua sanghnih(1.92 lakh) chawiin JEE-Advanced Programme 2020 April thlaa tan tur atan a fapa enrollment a tihsak a. Chutianga coaching class te an tan mek lai chuan zirtirna a chhe hle a. Mumal takin coaching class an nei thei lova. Chubakah an zirna hmanrua a chhe hle bawk. Hetiang a nih avang hian Nisha chuan a fapa chu he Coaching Institute atang hian lakchhuah a tum ta a. Thil engkim an peih fel hnu chuan Coaching tuition fee refund a dil a. Institute neitute chuan fee refund chu an lo phal sak lova. Hetiang a fee refund dan hi a awm love tiin an lo hnial a ni. Nisha-i chuan Consumer Commission hmaah chuan he Institute neitute hi a khing ta a. Thiamchantir a niin Institute hi fee refund tir bakah compensation leh legal cost chawitir a ni ta a. He Institute hi unfair trade practice ti a puh a ni a. Hrem a ni ta a nih hi! Heng Centre a zirlaite hi consumer an ni. Service an lei miau avangin.
Hetiang thu ka sawi thin hian chhan tha tak a nei e. Mizoramah hian hmun hrang hrangah coaching centre a awm a. Hengho hian inti itawmin service tha ber ber pek an intiam thin. Mahse hetih lai hian heng coaching centre emaw training centre te hian zirlaite mamawh an pe takzet em? tih chu kan zawhna a ni. He Institute pawh hian zirlai chhungte hnen atangin pawisa an hui lut teuh teuh va. Mahse trainee-te mamawh a phuhru zo chuang si lo a nih chuan chu chu an mawhphurhna a ni a. Consumer dikna leh chanvo tihchhiatna a ni a. Dan bawhchhiatna a ni. Commission thutlukna hi saptawng bawkin Han tarlang leh ila, ‘A student or a trainee may leave mid-stream if he/she finds the service deficient, sub-standard and non-yielding and to tell him/her that fees once paid are not refundable is gross unfair trade practices,’ tiin. He thil thleng hi 2018 October laihawl vel a mi a ni a. Complainant Nisha Agarwal pawisa hmuh let leh hi Rs 91,909/- zet zawt a ni. Mizoram a kan naute zirna hi sumdawnna mai chauh a ni thei em? Coaching Institute te hjan belh chian an dawl meuh em?Zirlaite hi consumer an ni a, an sum sen ang hu zirna an dawng ngei tur a ni. An beisei ang an phak loh chuan an chhuahsan thei a, an fee chawi zat atanga chhutin refund sak tur a ni. Churih rualin consumer court kan neih mekte hi intichak rawh se, an pawimawh lutuk si a!