Congress party thupuangtu Dr Lallianchhunga leh ZPM, Aizawl East II Block-in Inrinni khan bye-election neihna Tuirial bialah MNF party adviser, minister of state ni bawk, Robert Romawia Royte leh a \huihhruaiten dan an bawhchhia niin an sawi a. MNF party-in Robert Romawia’n dan a bawhchhe lo niin an sawi thung.
Congress party thupuangtu chuan inthlan ni, Inrinni zingah Hortoki khuaah Robert Romawia Royte leh a \huihruaite hmuh an nih thu leh MPF hruaitute hmalaknaa Hortoki atanga umchhuah an nih thu a sawi a. Campaign tawp ni, October 27, 2021 tlai dar 6 atanga inthlanna zawh hma chu bial pawn lam mi, candidate leh an agent-te bak Tuirial biala awm phal lohna dan leh thupek Kolasib district election officer pawhin a tihchhuah chu an bawhchhia niin a sawi.
Robert Romawiate chu Inrinni zing dar 6-ah Hortoki-ah hmuh an nih avangin Zirtawpni zan lamah pawh Tuirial bial chhungah an riak lut ngei tawh nia a lan thu Congress thupuangtu chuan a sawi a. “Sorkar dan an pawisa lova hre reng chunga sorkar dan bawhchhe lui an nih avangin an phu tawk hremna pe turin thuneitute kan ngen a ni,” a ti bawk.
MNF party pawhin hemi chungchangah hian Inrinni vek khan thuchhuah siamin, Robert Romawia’n dan a bawhchhe lo niin an tar lang a. Robert Romawia chu Saron Veng LC member Vanlalpeka, nena an ram enfel tura an kal chu eptu party ten mipui bum tumin election dan bawhchhiaah an puh mai niin an sawi.
Robert Romawia te chu Octotober ni 30 zing dar 3:45-ah Aizawl atanga chhuakin, zing dar 5:55 velah Hortoki an thlenga MPF-te nen tha taka inbiain Tlawng lui kaiah, Lengpui lam atanga lo hmuaktu Vanlalpeka te nen Tlawng an kan a, nilenga Lengpui leh Hortoki inkara ram enho tum an nih thu MNF thuchhuah chuan a tar lang a. An program chu Hortoki VCP pawh an hrilhlawk thu leh Hortoki-a din muan an tum loh avanga VCP pawhin MPF lam pawh a lo hrilh lem loh thu an tarlang bawk.
He thil thleng chungchanga thudawnna pakhat chuan Robert Romawia leh amah zuitute chu nilenga ram an enhova zan lama haw leh tur chauh nia an insawi laiin, October ni 30 (Inrinni) chhunah Kolasib district election officer (DEO) hnenah haw an dil leh si niin a sawi a. DEO chuan Tuirial bial paltlanga inthlan vote thlak theih hun ral hmaa haw chu a lo phalsak lo niin a sawi bawk a ni.