Aizawl West II bialtu, minister of state Lalruatkima’n nimin khan a biala LTF te tlawhkualin Rs. sing 5 theuh a pe a. Hripui leng mek chu mipui thuawihna leh tanrualna avangin a ziaawm chho zel nia sawiin, lawmawm a tih thu a sawi.
COVID19 thawhthumna lo thleng thei lakah fimkhur taka tha thlah lova awm a tul thu Lalruatkima chuan a sawi a. Covid do kawnga dan kengkawhtu sorkar leh LTF te VLTF te pawhin harsatna lutuk tawk lova tun dinhmun an thleng thei chu thawhhona that vang niin a sawi.
Lalruatkima chuan khawtlang hmasawnna pawh duh anga a kal theih loh thu sawiin, “Hriselna, kan dam nan sum kan hman a ngai si a, chhuanchham an awm a thiang lova, Covid thawhthumna lo thleng thei laka inpuahchah reng a ngai thova, tha thlah lovin fimkhurna kan kalpui reng a ngai a ni” tiin mipuite a chah.
“Kan inthlahdul hret a nih chuan kan pung leh hluai thei tih hriain, fimkhurna hrang hrang sorkarin a siamte zawm thain, kan mawhphurhna mitinin ngaipawimawh zel ang u” tiin Lalruatkima chuan mipuite a chah bawk.