Bajaj Pulsar N250 & F250 chhuak ta

auto corner
by Ruata

Bajaj Pulsar N250 & F250 chhuak ta

Bajaj chuan Pulsar 250cc khawl hmang pahnih N250 leh F250 chu ramchhungah an tlangzarh ta a. N250 hi Rs Nuai 1.38 man atangin a intan ang a, F250 hi Rs Nuai 1.40 man (ex-showroom Delhi ve ve) atangin a intan dawn thung a, tun thla ni 10 atangin hralhchhuah tan a ni ang.

Design leh kentel hrang hrang
Pulsar N250 leh F250 te hian LED headlight leh LED Daytime Running Lamp an nei ve ve dawn a. Heng bike pahnihte hian split seats leh digi-analogue instrumentation an nei dawn bawk a ni. F250 hian side glass thleh theih, foldable mirror kengtelin, a semi-fairing style nen a inhmeh em em a, a hmaa Pulsar 220F landan kha an rawn la pawl deuh a ni. Clip-on handlebar sang vah mai a hmang tel bawk.

A hmanraw kentel hi bike pahnihah hian a tam lutuk lo a, digi-analogue cluster RPM gauge lian kulh mai a awm a, an dah dan hi a inchawih mawi viau a ni. A LCD-ah hian gear position a lang thei a information dang neuh neuh a lang tel bawk. Bluetooth connectivity hi a awm lo a, USB charging point a awm tel thung a ni.

Pulsar N250 hian a hmalamah LED headlight neiin a hma bawr hi a mawi hle a. Bike pahnihah hian a hnunglam hi a lawk bur lo a, a design a zum vang mai a, twin LED tail-lights an hmang ve ve dawn bawk a, hei hi Pulsar dang hoah pawh kan lo hmuh tawh ang kha a ni. A alloy wheel design hi NS/RS model ho nen a inang dawn bawk a ni.

Engine leh gearbox
Bike pahnihte hian 24.5hp power leh 21.5Nm torque pechhuak thei, 249cc, SOHC, oil-cooled khawl a hmang dawn a. A khawl hman tur hi a hmaa Bajaj Pulsar 220F (20.4hp/18.5Nm) leh Dominar 250 (27hp/23.5Nm) te chak zawng nena khaikhinin an inkarah a awm dawn a ni. Gearbox lamah hian five-speed gearbox, slip & assist clutch awm tel a hmang dawn a ni.

Thildang
Bike pahnihah te hian NS/RS Pulsar ni si lo a hnunglam suspension-a monoshock a hman vawikhatna tur a ni a. Hei bakah hian a frame leh swingarm te hi a thar a ni bawk a ni. Heng danglamna te hian Bajaj Pulsar-ah thilthar tha tak a rawn thlen beisei a ni a, khalhtute tan pawh a hlui nena khaikhin chuan heng bike thar pahnihte hi an danglam viau tawh dawn a ni. A hmalamah thung hi chuan telescopic fork pangngai a hman chhunzawm a ni.

Brake lamah hian a hmalamah 300mm disc leh a hnunglamah 230mm disc a hmang a, single-channel ABS a nei dawn bawk. Pulsar thar pahnihte hian fuel tank litre 14 dawng an nei a, bike rih zawng lamah chuan N250 hi kg 162 a ni a, F250 hi kg 164 a ni thung a ni.

Leave a Reply

Your email address will not be published. Required fields are marked *

error: Content is protected !!