Serie A : Inter chak zanah AC Milan striker Zlatan-a’n 400 a kai

Serie A champion Inter Milan chuan hmahruaitu Napoli leh an hmelma AC Milan te umin Pathianni zanah hnehna an chang a. Joaquin Correa goal hnih khung hmangin 2-0 in Udinese an hneh.

San Siro-ah Simone Inzaghi pawlte hian first half-ah goal-ah vawi sarih lai ‘shot’ nei mahse goal an khung thei lova. Mahse minute 60-na leh 68-naah Argentina forward Correa chuan danglamna siamin an mamawh goal te a khung.

An hmelma Milan in tlem zawk ni chungin darkar chanve dawn khel mahse 2-1 in AS Roma an hneh thova. Striker Zlatan Ibrahimovic leh Franck Kessie ten goal an khung.

Kum 40 mi Ibrahimovic hian Serie A-ah a goal 150-na a khung a, professional football a khelh chhunga a league goal 400-na chiah a ni bawk. Milan hian minute 66-naah left-back Theo Hernandez chu yellow card a hmuh nawn avangin an chan a, Roma in huntawp dawnah Stephan El Shaarawy hmangin goal khat an khung ve thung.

League hmahruaitu Napoli in Piotr Zielinski goal khung hmangin 1-0 in Salernitana lakah hnehna an chang.

Leave a Reply

Your email address will not be published. Required fields are marked *

error: Content is protected !!