Khawvel ram 100 chuang zet chuan kum 2030-ah tul lova ram ngaw thiah tihtawp vek an tum.
COP26 neih meka thutlukna lian sak hmasak berah hian Amazon ram ngaw thiat nasa tak, Brazil pawh ram ngaw thiah titawp tura intiam zingah a tel ve bawk.
Intiamna tharah hian hemi atana $ tluklehdingawn 19.2 ruahmanna a tel bawk.
Ram hruaitute intiamnaah hian mi thiamte an lawm hle a, hetih rual hian kum 2014-a an lo intiam tawh anga ram ngaw thiah tihtawp a hlawhchham leh mai an hlauthawng hle a, tun tuma mi chu hlawhtling ngei tawh se an ti.
Thingkung kih hi sik leh sa inthlakah nghawng lian tak neiin thingte hi khawvel tilumtu, CO2 hip luttu a ni.
UK Prime Minister Johnson-an a thlen intawh khawmah hian ram 110-in intiamna hlu tak hi an siam.
“Kan ram ngaw neih kan hloh nasa lutuk hi kan titawp ang,” a ti a. Mihringin khuarel thil a hnehna thin titawpin a enkawltu a ni zawk tawh dawn tih a sawi bawk.
Glasgow khawpuia chawlhkar hnih awh tur summit hi sik leh sa inthlak nasa lutuk avangin mi tam takin an ngaihven hle.
Ram ngaw thiah titawp tura intiam zingah hian Canada, Brazil, Russia, China, Indonesia, the Democratic Republic of the Congo, US UK te pawh an tel a. Heng ramte hi khawvel puma ram ngaw awm 85% vel neitute an ni.
Ram ngaw thiah tihtawpna tura sum pek tur an tiamte hi ram thang mekte hnenah lei chhe tawh tihthat leh nan te, ram kang ven nan leh ram ngawa chengte enkawl nante hman turin tih a ni.