Newcastle United in Unai Emery an bia

Premier League club Newcastle United chuan Arsenal manager hlui Unai Emery chu an manager thar ni turin inbiakna an neihpui a, tunkarah lakluh fel an inbeisei.

Kum 49 mi hi Spanish club Villarreal enkawl lai mek a ni a, Magpies neitu thar ten Steve Bruce an ban hnuah an club enkawl tura an ngaihven zingah a hming a ri ring ber mek a. Inrinni zana Brighton an hmachhawn hunah an team a enkawl hman an beisei.

Magpies in an club enkawl tura manager an ngaihven zingah Bournemouth manager hlui Eddie Howe nen an hming a ni ring a, Lucien Favre, Paulo Fonseca leh Roberto Martinez te pawh sawi tel nimahsela English club hian Premier League a tawnhriat nei tawh coach lakluh an duh.

Spanish coach hian Villarreal-ah kum 2023 thleng contract a nei a, Magpies in an lalut dawn a nih chuan Villarreal hnenah hian Euro maktaduai 6 vel a contract la neih avangin an pek a ngai ang.

Emery hian Arsenal-ah thla 18 chiah hna thawk hmanin game 78 atangin vawi 43 a chakpui a, London club lian hi league-ah a sang pali zinga a telpui theih loh avangin Gunners in an thawhdunna an titawp.

Spain-ah erawh a record a tha a, Valencia kum li a enkawl chhungin a hnathawhin fak a hlawh a. Andalusia-ah Sevilla chu kum thum leh a chanve chhungin Europa League title vawi thum a lakpui a. France-ah Paris Saint-Germain chu Ligue 1 title leh tualchhung inelna dangah a hlawhtlinpui tawh bawk.

Leave a Reply

Your email address will not be published. Required fields are marked *

error: Content is protected !!