Kum 40 kaltaa album tihchhuah, ‘The Visitors’ chhutzuina tur ABBA album thar, ‘Voyage’ chu November 5, 2021 hian tlangzarh a ni dawn ta.
Swedish pop group lar takte hi 1974 khan Eurovison zai intihsiaknaah ‘Waterloo’ hla hmangin an champion a, hemi hnu hian rimawi khawvel awplum chhoin, an hla leh music te hian mi nuai tam takte lairil fanin, hneh takin ro an rel.
Album thar an hlui dawn tih an sawi rualin, an album hnuhnung ber leh tawpna a nih dawn thu an puangzui erawh chuan fan tam takte hrilh a tihai hle thung.
Benny Andersson (74) leh Bjorn Ulvaeus (76) te chuan ‘Voyage’ album an tlangzarh hnu ah an paliin album dang tihchhuah an tum tawh loh thu an sawi chiang a, kumthar hian London-a digital concert an neih hnu ah an awm zel dan tur pawh an sawi chiang ngam tawh lo bawk.
Group studio album pakuana tur ‘Voyage’ hian engti ang takin nge rimawi khawvel a al chhoh dawn hriat mai theih a nih loh rualin, mi tam tak lunglenna erawh a kai tho dawn e.