Antonio Conte-a’n Tottenham Hotspur a enkawl dawn

Tottenham Hotspur chuan manager thar lakluh nan hun rei an nghak lova, Chelsea leh Inter Milan coach hlui Antonio Conte chu kum 2023 thleng atan Thawhlehni tlai khan an lalut.

Premier League club che fuh lo hian Thawhtanni khan an manager Nuno Espirito Santo chu match 17 chauh a hnuaiah khel hman mahse an ban a. Spurs hi league-ah pariatnaah an awm mek.

Kum 52 mi Conte hi thla 18 chauh contract ziahpui rih mahse ziah belh theihna an inremnaah hian a tel thu Tottenham in an sawi a. Italian coach hian Chelsea-ah a season hmasa berah league title a lak nghal hnuah London-ah hna a thawk leh dawn a. A season hnihnaah Blues hi FA Cup a chawipui bawk.

Chiang zawkin
Juventus leh Italy pawh enkawl tawh Conte hi tun nipui khan Tottenham nen hian inbiakna lo nei tawh an ni a, Jose Mourinho thlaktu ni tura Spurs in an ngaihven zingah a tel. Nimahsela inbe hlawhtling lovin Spurs in June thla tawp dawn khan hmanhmawh takin Wolverhampton Wanderers manager Nuno lam an hawi ta zawk.

“Coaching hna ka thawk leh tur hi ka phur tawh hle a, Premier League club zinga a langsar berte zinga tel tum club-ah hna ka thawk tur hi ka lawmna belhchhahtu a ni. Player leh coach anga chak duhna thinlung, tumruhna leh paukhauhna ka neihte hi ka team thar leh kan fans ten min tawmpui theihna tura hnathawh hlan ka nghakhlel tawh hle.” tiin Conte chuan a sawi a.

“Nipui laiin kan inremna a thleng thei lova, Inter Milan chhuahsan hlim chauh ka nih avangin ka rilru lamah pawh keimah ka la inpeih lova, coach hna chelh hma a hunthawl neih leh ka duh. Mahse Tottenham chairman Daniel Levy-a’n mawhphurhna min pek a duhna leh thawhdun a duhna kawnga a tumruhna leh phurna hi hai theih a ni lova, hei hian ka thutlukna thui takin a kaihruai. Tunah inremna a fel vek tawh a, ka hnaah hian engkim ka hlan ang.” tiin a sawi.

Conte hian Inter Milan chu kum 11 chhunga an Serie A title hmasa ber season liamta khan a lakpui a, mahse club hotute nen an thu a inhmuh loh avangin May thla khan club a chhuahsan.

Spurs-ah hian a inkhel enkawl hmasak ber tur chu Ningani zanah Europa Conference League-ah niin Dutch club Vitesse Arnheim a hmachhawn anga, Pathianni zanah Everton nen Premier League-ah an inkhel ang.

Tottenham managing director of football Fabio Paratici chuan, “A record hi sawi nawn leh a ngai lo, Italy leh England-ah tawnhriat leh trophy a ngah. Antonio theihna rawn ken tur hi ka chiang a, ka thawhpui tawh a ni a, kan player talent nei tha tak takte nena hna an thawk tur hi ka hmu chak tawh.” a ti ve bawk.

A lang lo lam
Spurs hian Conte hi Premier League a manager hlawh hnem ber zinga tel turin an lalut a, league chanchin a coach hming langsar leh hlawhtlinna lo nei hraw tawh tak zinga tel nghal ni bawk tur an lalut.

Pep Guardiola, Thomas Tuchel leh Jurgen Klopp te nen an inel tur chu Premier League titi tui ber a ni dawn.

Spurs nen inbiakna an neih fel thuai theih danah Fabio Paratici a pawimawh a, Spurs hian an coach thar chungah hian rinna nghah thuk an inhuam tih a lang a. An contract pek hi rei lo mahse pawhsei theihna an dah tel avangin fimkhur tak chung siin hmathlir an nei thui.

Manager tum ruh leh thu duh tak in hna a thawh dan hi Tottenham in an hre lo dawn lova, mahse Juventus a lo thawkdun tawh Paratici an neih avangin hlawhtlinna kawng an pahnihin an zawhpui thei turah an ngai.

Chutihlaiin Italy lama football expert-te chuan Conte hian hun a mamawh dawn a, tin Spurs hi club sum thehchhuak hnem thei tak tur an nih loh avangin a tan thil a awlsam dawn lova, a hlawhtling kher ang em tiin zawhna an zawt.

Juventus neituten sum an thehchhuah duh loh avanga, “Thingpui dawr Euro 100 manah Euro 10 nen chauh min chawlhtir an tum.” tia tehkhinna tawngkam nei tawh Conte hi Inter Milan neitute nen pawha an inhmuh thiam lohna chu club sum dinhmun siamthat nan a player tha an hralh a ngaih bakah player leina tur sum an pek theih loh vang a ni tawh a.

Premier League club hotute zinga sum hman zawnga fimkhur leh fing ber zing ami nia ngaih Tottenham chairman Daniel Levy nen engtinnge hun rei zawk hnuah an thawhdun zel ang tih an thlir uluk hle bawk.

Leave a Reply

Your email address will not be published. Required fields are marked *

error: Content is protected !!