India-in kum 2070-ah boruak tichhe thei pek chhuah thin tihtawp vek a tiam


India chuan boruak leh khuarel thil tichhe thei a pek chhuah \hin chu kum 2070-ah tihtawp hmak a intiam a, hei hi khawvel huapa COP26 summit-in kum 2050-a tihtawp vek a tumna chu a phak lo nasa hle.
Prime Minister Narendra Modi chuan summit-ah hian ram intiamna hi a puang a, Glasgow khawpuia intawh khawma intiamna a neih hi India-in boruak tichhe thei thil tihtawp vek tumna a intiamna hmasa ber a ni.
Boruak tihchhe thei thil pek chhuak loh, net zero emission an tih hi greenhouse gas an tih hrang hrangte boruaka awm tur engmah pek chhuah loh a ni.
China chuan kum 2060-ah India intiamna ang hi tihhlawhtlin a intiam a; United States leh European Union ramte chuan kum 2050-ah tihhlawhtlin hman an tum thung.
Indian hruaitu hi Glascow khawpuia hruaitu 120 chuangin chawlhkar hnih chhung inkhawmpui an neiha tel ve zinga pakhat a ni.
Thawh\anniah khan sik leh sa inthlak zel beih letna tur kawngah hruaitu hrang hrangten thu an sawi a. Heng zingah hian UK Prime Minister Boris Johnson, US President Joe Biden leh UN Secretary General António Guterres te pawh an tel.
President Biden-a chuan khawvelin sik leh sa inthlak nasa do let turin hun \ha ni tin a hloh zel tih a sawi a, chet lak loh rah chu a pung tawlh tawh tih a sawi.
Khawvel lum zel chuan khawvel ei bar dinhmunah pawh nghawng lian tak a nei tih a sawi bawk.
India hi khawvela China, US leh EU dawta carbon dioxide pe chhuak tam ber ram a ni.
Mahse, mihring an tam em avangin mi pakhat zelin a pek chhuah zat erawh khawvela ram hausa ai chuan a tlem zawk hle a. Kum 2019 khan mi pakhatin CO2 hi tonne 1.9 zel tichhuak ang a nih laiin US-ah chuan tinne 15.5 leh Russia-ah tonne 12.5 daih a ni.
Modi-a chuan a ramin intiamna panga a neih zingah kum 2020-a a tihchhuah tihtawp tumna hi a telh.
Intiamna zingah hian India chuan kum 2030-ah chuan hman nawn theih thil (renewable resource) chu 50% zet hman a tum tawh a. Carbon a pek chhuah thin pawh tonne tluklehdingawn khata tihtlem hman a tum bawk.
Kum 2070-ah daih CO2 pek chhuah tihtawp a tum hi Glasgow-a pung khawm mi thiam leh sik leh sa lam veitute chuan tlai an ti hle a; mahse, Modi-a hian a ram dinhmun thlirin hei bak a sawn thei lo.
Sik leh sa lam veitu pawl pakhat, Council on Energy, Environment & Water-a Chief Executive Officer Arunabha Ghosh chuan India intiamna chu tha hlea a hriat thu a sawi ve thung a. “Hei hi sik leh sa thua chet lakna tak tak a ni,” a ti.

Leave a Reply

Your email address will not be published. Required fields are marked *

error: Content is protected !!