Kabul-a sipai damdawi in beihnaah mi tam tak thi


Afghan khawpui, Kabul-a sipai damdawi in awmnaah Thawhlehni khan thil puak na tak pahnih awmin silai a puak zui bawk.
Taliban thupuangtu, Bilal Karimi chuan a puak hmasa zawk hi khum 400 awmna, Sardar Daud Khan damdawi in kawtah leh a hnuhnung zawka mi pawh hi a bul lawkah a nih thu a sawi.
Karimi hian Taliban fighter-ten a beitu, IS-K mi pali an kah hlum thu leh mi pakhat dama an man thu a sawi bawk.
Thupuangtu hian thi an awm nual thu a sawi a; mahse, engzat nge tih erawh a sawi lo va. Damdawi in tualah hian inbeihna a thleng niin a hmutute chuan an sawi.
“Venhim hna thawktute tirh luh an ni a, thi leh hliam zat hi engmah kan la dawng lo,” tiin Twitter-ah a tar lang bawk.
Mi 15 vel thi awmin mi eng emaw zatin hliam an tuar bawk nia sawi a ni a, finfiahna erawh a la awm thei lo thung.
Kabul a\anga thlalak leh video darhah chuan thil puahna velah hian van lamah mei khu a chho nasa hle a, silai puak thawm pawh hriat tur a awm bawk.
Taliban thuneitute chuan thihchilh bomb leh silai kengten an beih thu an sawi zui bawk.
Eng pawl mahin an tihah an la chhal lo chungin Afghanistan-a Bakhtar news agency chuan thil thleng hmutute chuan Islamic State pawla miten damdawi in hi luhchilhin venhim hna thawktute nen an inbei niin an sawi tih a tar lang.
Doctor pakhat chuan inhumhim turin pindan himah nawr luh a nih thu AFP news agency a hrilh.
“Damdawi ina silai puak thawm ka la hre thei reng a. A beitute hian pindan tin an luhchhuah niin ka hria,” a ti.
A thawk dang pakhat, tlan chhuak chuan thil puak na tak a hriat hnu lawkah silai ri a hriat zui thu leh minute 10 hnu veah puak dang a awm leh thu a sawi.
Thil puak leh silai ri hi damdawi in hung chhung veka mi a nih em tih a hriat chian theih loh thu a sawi bawk.
Taliban Special Forces chu a hmunah hian thlengin a beitute hi an bei let ve mek niin interior ministry chuan a sawi.
Afghanistan ram hi August thla khan United States leh a \anrualpuiten kum 20 zet an awmchilh hnuah chhuahsanin Taliban hian mipui sorkar chu paih thlain thuneihna an chang zui nghal.
Hemi hnuah hian n ram chhunga Islamic State firfiak pawl, Islamic State Khorasan (IS-K) an tihte chuan Taliban figter leh civil mite an bei nasa hle.
Tun \uma beih tawk, Sardar Daud Khan damdawi in hi Afghanistan-a sipai damdawi in lian ber niin Kabul-ah 10th district-a awm a ni.
Kabul damdawi in beihna hi a titua inchhal la awm lo mah se Bakhtar News Agency chuan ISIL (ISIS) miten an luhchilh a, venhim hna thawktute nen an inbei niin a tar lang.
August thlaa khawthlang lamin an thlawp Afghan sorkar hneha thuneihna an chan leh hnuah Taliban dotu, ISIS firfiakte hi an che nasa hle a. Taliban bakah civil mi pawh an bei nasa hle.
ISIL-a inziak lut, ISKP (ISIS-K) an tihte hian Taliban-in thuneihna an chan hnuah hian mosque leh hmun dang dang an lo bei tawh a. Tun tuma an beih, khum 400 awmna damdawi in pawh hi kum 2017 khan an lo bei tawh a, hemi tum hian mi 30 chuang an thi a, mi dang 50 velin hliam an tuar bawk.
August thla khan Kabul international airport pawh an lo bei tawh a, civil mi 150 chuang zet leh US sipai 13 an thi a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427