Aizawl: Social Welfare Minister Dr. K. Beichhua chuan nimin khan mitdel zirlai mi paruk tlanchhuahte hnenah Digital Voice Recorder a hlan.
Digital Voice Recorder hlanna inkhawm, a pisaa neihah minister chuan thu sawiin, “Mihringte hi tlin lohna nei vek kan ni a; amaherawhchu, nangni chu taksa lamah chaklohna nei mah ula rilru lamah chakna in nei thung a, in chak lohna hi Pathianin thil dangin a rul let che u a ni,” a ti.
“Tun hma chuan mitdelte chu kutdawh tur anga ngaihna kan society-ah a awm \hin a, khawvel changkang chho zelah chu chu a bo tawh a, huaisen tak leh nghet takin kal zel ula, zirnaah pawh mi vantlang chung lam vek in ni thei a ni,” tiin a sawi bawk.
Dr. Beichhua chuan, “Sorkarin pianphunga rualbanlote chu an harsatnate a hriatpui a, an tana hmalakna kalpui reng chu sorkar duh dan a ni,” a ti a. Social Welfare Department ang leh Person With Disabilities (PwD) commissioner hovin Covid-19 boruak a ziaawm zel chuan hma a la zel dawn tih a sawi.
Nimina Digital Voice Record hlanna inkhawm hi Social Welfare Department hnuaia PwD Commission buatsaih niin, a dawng tur zirlai paruk tlanchhuah an ni.
Voice Recorder hlanna inkhawm hi Social Welfare Department Secretary, Sangchhin Chinzah-in a kaihruai a, Commissioner, PwD, Vanlaldiki Sailoin lawmthu sawina neiin, programme tihtawp a ni.
Dawngtute
- Julie Lalnunremi, MA (Mizo, 3rd Sem) MZU
- C. Ludi-i, B. Ed (3rd Sem), SCERT, Aizawl
- Lalrampana, BA (Mizo, 5th Sem), Govt Kolasib College
- K. Beimopha, BA (Pol. Sc, 5th Sem), Govt Kolasib College
- David Lalremruata, BA (Pol Sc, 1st Sem), Govt Kolasib College
- Thangbiaksawn Tonsing, BA (English, 1st Sem), Govt Kolasib College