Higher & Technical Education Minister Dr R Lalthangliana chuan post matric scholarship chungchanga harsatna awm mek chin fel a nih thu a sawi a, scholarship second instalment tribal affairs ministry-in an rawn release loh chu Thawhlehni tlai khan an release tak thu leh sanction order pawh an hmuh nghal thu a sawi.
Dr R Lalthangliana chuan post-matric scholarship buai chungchangah Mizoram sorkar thiam loh a awm loh thu sawiin, tribal affairs ministry lam pawhin an tihsual palh liau liau a ni tih an pawm tih a sawi.
Kum kalta 2020-2021 khan post-matric scholarship first instalment an rawn release hnuah second instalment an rawn release leh tura ngaih a nih laiin, kumin kum kal lai mek 2021-2022 a mi tur post-matric scholarship first instalment an rawn sanction leh ta daih mai tih sawiin, “Rs vaibelchhe 13 chuang niin hei hi finance department-ah allocation turin thehluh fel vek tawh a ni a, state matching share pawh planning department ah dil tawh niin, reilo teah peih fel beisei a ni,” a ti.
Ministry of Tribal Affairs lamin nikum a mi tur second instalment sanction hma a kumin a mi tur first instalment an sanction tih an hriat veleh a theih anga ranga an bawhzui thu leh amah ngei pawhin lehkha bakah telephone hmanga ministry lama hotute vawi duai lo a biak thu a sawi.
Dr Thangtea chuan, kar hmasa lamah pawh Mizoram Scholarship Board-a officer-te a umzui tura an intirh thu a sawi a, Thawhlehni tlai khan kum 2020-2021 post-matric scholarship second instalment Rs vaibelchhe 10 chuang an rawn sanction ta nghal tih leh zirlaiten a hma thei ang bera an lak ngei theih nan hma an la dawn tih a sawi bawk.