Mizoram sorkarin oil palm chingtute hnenah support price kg khat zelah Rs 4.50 pe chhuak turin order a tichhuak.
Agriculture Director Rohmingthanga Colney chuan November 2 khan order hi a tichhuak a, kum 2021 January- July thla chhunga Mizorama oil palm thar chhuah metric ton 3,240.385 atan special assistance atangin Rs 1,39,14,459 pek chhuah a ni dawn.
Order-a tar lan danin Kolasib district-ah Rs 36,29,083.50, Mamit district tan Rs 73,22,238.00, Aizawl district tan Rs 56,205, Serchhip district tan Rs 2,95,695, Lunglei district tan Rs 10,24,789 leh Lawngtlai district tan Rs 15,86,448 te a ni.
Support price atana fund release hi Godrej Agrovet Ltd leh Ruchi Soya Industries Ltd. ten oil palm chingtute hnena an leina statement behchhana siam a ni.
Mamit District Agriculture Officer (DAO) Zokhuma Varte chuan, Mizoram pumah Mamit district chu oil palm thar chhuak hnem ber a nih thu leh tuna sorkarin support price an pe chhuak ta chu oil palm chingtute pawh an thawh rah an seng mai bakah phurna nasa tak a pek ngei a beisei thu sawiin, “Heng support price-te hi oil palm neitute bank account-ah thun luh nghal tur a ni,” a ti.