A thenin Jeans an ha a, thenkhat erawh Jeans in a ha ve thung.
Ha tawt ve hrim hrim tan, chanchin lawmawm chu a ni hauh dawn lova, kawnghren rek lutuka hrengte tan paw’n beiseina a pe thui bawk lovang.
Kawr hakah pawh a ni tho, a hnuai lam rek lutuk hi a tha lo hle mai a, hetiang ang kan hak hian hnungzâng ruh zawmtu spine hian a tuar hle a, khel bawr vela Jeans ha thinte tan phei chuan hlauhawm a hnai.
A chhan chu, khel-a hak hian thazâm (nerves) a rek vak a, chu chuan ke lamah harsatna a thlen ta thin a ni.
Thisen kal a tihkhawloh bak-ah taksa bung hrang hrang chetna a khawih danglam thei. Kawnghren rek lutuka hren hian mipa serha thisen luanglut tur a timuang a, inthlahchhawnna kawng a tikhawlo thei a ni.
Thisen kal a that loh vangin taksa peng hrang hrangte chuan an hna an thawk tha thei lova, thisen khawp kham loin harsatna an tawk thin.
A bik takin, office a thawkte tan fimkhur a ngai leh zual a, thawmhnaw tawt em em ha chunga taksa che si lova, nilenga thut te hi taksa in a haw hle a, prostatis a neih theih bakah cancer pawh a vei theih.
I pasal emaw i bialpa khan hre rawh se. Mipa tan pawh fimkhur na tur a tam hle a, underpant tawt lutuk hak hian tilmu (testicles) nasa taka tisain chi a siam tlem nghal a, hei hian chi inthlahna turah nasa takin kawngro a su tih hriatchhuah a ni.
‘Hmeichhe lam tan a him e’ tihna a ni chuang lova, malpui leh chawn phuar tingtenga ha thinte tan inhmuhchhuah ran a tha hle bawk ang.
A chhan chu, hmeichhe serh leh a bul velah thli a luh tir thei lo thin a, nasa taka boruak lum siam sakin natna tha lo tak tak kai theihna awlsam tak a ni.
Chuvang chuan, kan hriattur chu… thawmhnaw reng reng, tawt lutuk lo lam chi hi mihring tan a tha ber a, taksa peng hrang hrang kan phuar beh vak hian mahni kan intihrehawm mai mai tih hria ila, thawmhnawin min hak em loh chuan thâwl lam chi hi hak i uar tawh teh ang u khai.