Mizoram Football Symposium 2021 an buatsaih

Mizoram Football Association leh Mizoram Youth Commission tangkawp chuan nimin khan Aizawl a Synod Conference Centre ah Football Symposium an buatsaih.

Chawhnu lamah MFA leh District hrang hrang Football hruaituten General Body Meeting an nei zui.
Kawng hrang hranga Mizoram football hmasawnna tur sawiho a ngaihtuahna hun – symposium ah hian Samson Ramengmawia chuan Coach education leh Player’s registration chungchang a hriattur pawimawh te a sawi a. AIFF match commissioner R Malsawman Refereeing Education chungchang a sawi.
Hmingthansanga chuan Grassroots & Youth Development chungchang a sawi bawk.

Resource person te hian Mizo thalaite zingah football khel thiam, club hrang hrangah tam ve hle tawh mah ila, coaching lamah thleng sang tak kan la awm loh thu te, refereeing lamah pawh thleng sang kan la awm loh avanga tan lak a tul zia te, football a hmasawn tak tak turin naupang grassroots atanga theihtawp chhuah a hmalak a tul zia te an sawi a. District FA hrang hrang hruaituten an hriat duhte zawtin Resource person te leh State FA hruaituten inhrilhhriat ngaite an hrilhfiah.

Chawhnu lamah MFA President Pu Lal Thanzara kaihhruaiin special general body meeting an nei zui a, kum 2021-2022 season a football kalpui dan tur an rel ho.

MFA Hony. Secretary Lalnghinglova Hmar chuan report pe in, nikum atanga hrilengin Mizoram a football kalphung a tihbuai zia a tarlang a. Chutihlai karah boruak a zia tak deuh avanga Santosh trophy khel tur mipa senior team din chhoh dan te leh Senior women’s team din chhoh dan te a sawi lang.

Kumtharah inelna pathum
Kum 2021-22 season engemaw chen la awm a football inelna kalpui dan tur relho a ni a. Hrilengin ziaawm lam a la pan tak tak loh avangin kumin chhungin district hrang hrang inelna kalpui hrih loh an rel.

Chutihrual erawh chuan district hrang hrang te chu an huang chhunga inelna kalpui dan turah an kuta thuneihna dah a ni a. Kum thar February chhovah boruak te a that zel chuan district hrang hrang inelna kalpui tum a ni thung a, District FA hrang hrangin inelna thlen an inhuam thu an sawi.

Kumthar lamah hrilengin ziaawm lam a pan a, sawrkarin rem a tih chuan MFA Cup khelh a ni nga, a thleng turin Saitual DFA ruat an ni.
Junior Boys Under 17 championship thleng turin Siaha DFA te ruat an ni a, Women’s championship thleng turin Hnahthial DFA te ruat an ni bawk.

Football Symposium ah hian Laldawngliana, MFA Executive Committee member buatsaih Inkhel En Tinuamah tih lehkhabu, Football dan bu chu tlangzarh a ni.

Leave a Reply

Your email address will not be published. Required fields are marked *

error: Content is protected !!