Leicester City in UEFA Europa League knockout stage atan an dinhmun an la tichiang thei lova. Spartak Moscow nen 1-1 a an inhnehtawk avangin an tling zo ang em tih zawhna an hmaah a awm mek zawk.
King Power Stadium-ah Foxes tan substitute Jamie Vardy chuan penalty an hmuh a khung lova. Group C-ah club pali awmte an inthlauh loh avangin Brendan Rodgers-a pawlte tan point thum hmuh loh a pawi hle thei.
Mahni mualah Foxes in inkhel an thunun zawk a, ball chang tam zawkah tangin an chan a tha zawk fo. Mahse second half tan tir lamah Spartak Moscow in rang takin goal an nawr thut a, an winger Victor Moses chuan an hmahruaina goal a tauh lut.
Goal an chhuah hnuah Foxes an harh a, Daniel Amartey chuan Ayoze Perez siamsak khungin an chhanglet thuai a. Moses-a’n penalty chawi zui mahse Vardy-a’n a khung loh avangin chak zawk an awm lo.
“A awlsam dawn lo tih kan hria a, kan khelh tur pahnih la awmte mahni mualah a ni a, pakhat a kan chak chuan tlin kan hnaih tawh hle a, kan chak ve ve chuan kan sang ber dawn a ni.” tiin Brendan Rodgers chuan inkhel zawhah a sawi.
Inkhel dangah Bayer Leverkusen tan Moussa Diaby chuan goal hnih a khung a, Florian Wirtz leh Nadiem Amiri ten goal khat ve ve khungin 4-0 in Real Betis an sawp a. Napoli pawhin an group a hmahruaitu ni turinpenalty vawi hnih an hmuhna inkhelah 4-1 in Legia Warsaw an hneh.