Iraqi Prime Minister Mustafa al-Kadhimi chuan a chenna in, Baghdad-a venhimna khauhna lai, Green Zone an tihah drone hmanga beih niin a him hlauh tih a sawi.
Puak thei phur drone hmangin a in hi sut puah a ni a, amah vengtu mi parukin hliam an tuar a, thah tumna ngei a nih thu thuneitute chuan an sawi.
al-Kadhimi-a chuan mipuite chu ‘zaidawh leh ngaihthaa awm turin’ a chah nghal.
Prime minister-in beih a tawh hi tun hnaia inthlan result avanga lungawi lohna thlengah tharum thawhna nasa tak a thlen hnu a ni a. Inthlan result hi United States leh Iran pawhin dik tawk lo an ti.
Venhim hna thawktute chuan beih nan hian drone pathum hman a nih thu leh River Tigris chunga Republic Bridge bul atanga thlawh chhuahtir a nih thu an sawi a; mahse, pahnih chu an kap thla.
Tute mahin an tihah an la chhal lo va, prime minister chenna hi sorkar in pawimawh leh ram dang embassy awm nualna hmun a ni.
Iraqi chanchinbuten thlalak an thehdarhah chuan in hi a chhe nual tih a lang a, lirthei hunna hmuna SUV dah pawh a chhe tel.
Venhim hna thawhna lama hotu pakhat chuan drone keh darhte chu zir chian atan an la tih Reuters news agency a hrilh.
“Tunah rih chuan beihna hi tute nge thlen tih sawi nan a la hma deuh,” a ti a. “Kan hnu chhui mite report leh an chhuina kan ngaichang ang a, tute nge hetiang titute hi hriat thuai a ni ang,” a ti bawk.
al-Kadhimi-a beihna ang, vantlang pawhin an hman mai thei drone-a puak thei phurhtira mi beih hi Islamic State helhovin Iraq hmar lam hmun thenkhata thuneihna an chan lai khan an hmang nasa hle a. A bikin kum 2017 vel khan Mosul beih nan an uar hle.
Intelligence chief thin, al-Kadhimi hi nikum May thlaa prime minister atana lak luh a ni.
Tun hnai chawlhkar rei vak lo liam taah khan Iran lam nena inzawmna nei political party chuan Green Zone bulah hian lungawi lohna an lantir.
Heng mite hian thla hmasaa an ram inthlanpui result chu an pawm lo tih sawiin vote chu nasa taka khawih chingpen niin an sawi.
Kar liam taah pawh khan heng mite leh venhim hna thawktute chu innawr buaiin mi 100 chuangin hliam an tuar.
Shia Muslim puithiam, an ram inthlana a kaihhruaia chakna sang ber changtu, Moqtada al-Sadr chuan prime minister beihna chu an ram ngialnghehna tihchhiat tuma mi firfiak chetnaaah a puh a. “Iraq hi ram buai leh sorkar sipai ni lote thununna hnuaia dah leh tuma beihna a ni,” a ti.
President Barham Saleh pawhin pawikhawihna rawng tak a nih thu a sawi a. Twitter-ah, “Hetianga buaina rama Iraq chhuah tumna leh sipai chakna hmanga ram danpui anga rorelna awm tihnghin tumna ang hi kan pawm ngai dawn lo a ni,” a ti bawk.
US state department thupuangtu, Ned Price pawhin ‘firfiaka chetna rawng tak’ tia sawiin, ‘Iraqi ram pawimawh lai tak beihna’ a ti a. America chu a chhuinaa pui turin a inpeih reng tih a sawi bawk.
Iran-a Supreme National Security Council Secretary Ali Shamkhani pawhin a hming sawi lang lovin ram dang mi, buaina chawh chhuah tuma mi firfiakte thlawptu leh Iraq-a awm mekte thil tih a nih thu a sawi a. Iraq-a hetiang pawi hi khawih mah se a tihim lo chuang lo vang a, a kal dan a tibuai lo vang a, a nghin phah dawn lo tih a sawi.