India chuan SABA Men Championship 2021 khel tura senior men’s basketball team a tirh turah Mizo basketballer Lalrina Renthlei chu a ko tel.
India team hian Dhaka, Bangladesh-ah November 15 atanga 20 chhungin South Asia ram dangte nen inelna an hmachhawn dawn a. Tunah hian Bengaluru-ah training camp neiin an inbuatsaih mek.
SABA Men Championship 2021-ah hian India hi Sri Lanka, Maldives, Bangladesh leh Nepal te nen an inel dawn a. Inrinni hian an inkhelhna tur Dhaka an pan ang.
Mizoram Super League title vawi li la tawh Lalrina hi MSL 4, 5 leh 6-ah te Most Valuable Player chawimawina dawng tawh a.3×3 Basketball ah FIBA Indian Player Ranking ah pakhatna hun rei tak hauhtu a ni bawk.
“Coach nen kan inbia a, Inrinni khan thlan ka nih thu hi ka hria a, Pathian zarah ka vannei hle. Keimah rau rau ah tunhnaiah hliam tenau ten min tibuai ve a, mahse tunah ka inkhel leh thei tawh a. Training camp-ah pawh practice match kan neihah first five-ah min khelhtir thin.”
“South Asia-ah hian India hi pumrua leh thildangah pawh a tha pawl an ni a, hei vang hian tun Championship-ah pawh beiseina chu kan nei sang.” tiin Times Sports hnenah Lalrina chuan a sawi.
MBBA president Dr. Lalrinawma Hnamte chuan, “Lalrina hi skill nei tha a ni a, a tum a ruh. A rilru leh theihna zawng zawng pe a ni a, a chhungten an thlawp tlat bawk a, hengte hi tun dinhmun a thlen theih chhan a ni in ka hria.
Basketball hi pumraw len ngai a ni a, Mizote nena inmil lo ti thin mahse tumruhna leh inpekna nen, thiamna nei tan chuan India ai kan awh theih tih a chiang.” tiin a sawi ve bawk.
India hi Serbian head coach Veselin Matić hnuaiah an inkhel ang