Indian khawpui, Delhi chu Hindu sakhaw kûtpui, Diwali hun laiin kum dang ang bawkin a boruak a chhe hle.
Kum dang ang bawkin kut lawm nana hal mawi hal chu a chhan lian berah puh a ni a. Hetih lai hian India-a Supreme Court chuan halmawi hi boruak tichhe lo chi (eco-friendly) hman a phal.
Halmawi leh halpuahte hian eng chiahin nge nghawng a neih?
Zirchianna hrang hrangah chuan Diwali hun lai hian boruak a bawlhhlawh zual ngei tih an hmu a; mahse, a chhan dang pawh a awm an ti.
Eng ang fakau nge?
Tun hnai kum eng emaw ti chhung hian Indian khawpui lianah hian boruak a bawlhhlawh nasa hrim hrim.
Delhi-ah bik hian kum 2020 khan Covid-19 vangin inkharkhip ni mah se boruak chhe lutuk avangin mi 57,000 zet an thih hun aia hmain an thi niin Greenpeace chuan a sawi.
World Air Quality-in kum 2020-a report a siamah chuan khawvela khawpui boruak bawlhhlawh zual 30 zinga 20 zet chu India-a mi a ni a. Mihring hriselna atana pawi ber?boruaka awm zat, PM2.5 an tih chu a sang hle.
PM2.5 hi WHO-in a him tawk a thliarna aia sang daih a awm.
Kumin bikah hian Delhi leh hmar lama khawpui lian dangah chuan boruak bawlhhlawh an tawng nasa a; mahse, Diwali-a halmawi hal vang chauh a ni lo.
Punjab leh Haryana-a lo neituten an thlai sengna ro an hal khu te, lirtheiin khu a tihchhuah te, Delhi leh a chhehvela thil siamna hmunin meikhu a chhuah te leh khaw awm dan zir loh vang hrim hrimte pawhin a awm.
Diwali-in a nghawng chu
State tam tak chuan Diwali lai khan halmawi leh halpuah hal an khap a; mahse, a hunah chuan zawm a hlawh meuh lo.
Kum 2018-a zirchiannaa Diwali-in a nghawng leh nghawng loh zawhnaah chuan ‘tlem chu nghawng mah se a ni ber lo’ tih chu chhanna tam ber a ni.
He mi tuma zirnaah hian Delhi-a hmun panga chu innghah nana hman a ni a, kum 2013 leh 2016 inkar dinhmun rin a ni bawk.
Diwali hi Hindu lunar calendar mila a hun hman niin October thla tawp leh November thla tir lamah a ni ber thin.
A hun inang lo hian boruak dinhmunah danglamna a thlen hle a. Lo neituten thlai sengna ro an hal hun laiin a nan leh nan lovah a innghat ve hle.
Zirtute zinga mi, Dhananjay Ghei chuan, “Nasa thlalemin a thil hmuhte chu thlai ro hal leh hal loh en nan kan hmang ber,” a ti.
Kum li chhunga kum hnihah hian Diwali lawm hun lai leh lo neitute thil hal hun a innang lo.
An zir chian hmun pakhatah chuan kûtpui chawlh vangin thil siamna hmun a che lo tih an sawi a. Khaw awm danin kawngro a su hle tih an hmu bawk.
An thil hmuh langsar tak chu kût ni hnihnaah PM2.5 chu 40% dawnin a sang tih a ni a. Hei hi Diwali tawpah a tlahniam leh.
A darkar bi zawnga teh chuan thim hnu, tlai dar 6:00, kût lawmna tan tak tak atanga darkar nga vel chhung chu PM2.5 hi 100% zetin a sang.
Delhi-a hlawkna um lo pawl, Centre for Science & Environment pawhin khawpuiah hian PM2.5 hi kum 2018, 2019 leh 2020-ah a sang vek an ti bawk.
Boruak tichhetu dang?
Halmawi leh halpuah bakah hian lirthei veivak nasa chu boruak tibawlhhlawh zualtua ngaih a ni a. Diwali lai hian bazara thil lei ringawt pawh an tam a, thian leh chhungte tlawha tei kual pawl an tam zual.
Boruakah hian lirthei khu nge halmawiin PM2.5 titam tih erawh zir chianna a la awm lo.
A hranpaa Jamshedpur khawpui dinhmun zirnnaah chuan Diwali laiin boruakah mihring tana tha lo chu a pung ziah tih hmuh a ni.
Sorkar hnuaia mi, Central Pollution Control Board chuan halpuahin mihring tana tha lo a tichhuah thil 15 an chhinchhiah a. Lirthei khuin a tihchhuak eng emaw zat a awm bawk.